БИШКЕК, 19-мар. – Sputnik. Ажылыкка бара турган зыяратчыларды ташый турган улуттук авиакомпаниялар 26-27-мартта тандала турган болду. Бул туурасында Муфтияттын маалымат кызматы билдирди.
Ажыларды ташуу үчүн тендерге катышууга арыз берген Кыргызстандын жана Сауд Аравиясынын улуттук авиакомпанияларынын документтерин тендердик комиссия 19-мартта толук эмес деп таап, аны толуктоого дагы бир жума мөөнөт берди.
Зыяратчыларды ташый турган компанияларга жарыяланган тендер 16 талаптан турат. Зыяратчыларды кабыл алып жаткан Сауд Аравиясы ажылыкка келгендерди мамлекеттик авиакомпаниялар гана ташышы керек деген шарт койгон.
Тендердик комиссияны Кыргызстан мусулмандар Дин башкармалыгынын жетекчиси Максат ажы Токтомушев жетектеп, анын курамына муфтияттын, Дин иштери боюнча мамлекеттик комиссиясынын жана УКМКнын өкүлдөрү кирген.
Дин иштери боюнча мамлекеттик комиссиянын бөлүм башчысы Бакыт Осмонов Sputnik маалымат сайтына 2015-жылдагы ажылык сапардын баасы кымбаттарын, бирок, ал авиакомпанияларга жарыяланган тендердин жыйынтыгынан кийин белгилүү болорун айткан.
