Оторбаев: бул акыркы жардам эмес, дагы чогултулат

БИШКЕК, 26-ноя — Sputnik. Кошумча гуманитардык жардамдын чогултулушу мүмкүн экендигин премьер-министр Жоомарт Оторбаев өлкө аймагынан чогултулган жардамды Ысык-Көл облусуна жөнөтүп жатып билдирди. 

Чүй, Нарын, Ош, Баткен, Жалал-Абад, Талас, Бишкек жана Ош шаарынын тургундары менен жергиликтүү өз алдынча башкаруу органдарынын өкүлдөрү гуманитардык жардамга каражат которушкан.

"Бюджеттик эмес каражаттын 50 миллион сому жабыр тарткан аймактын тургундарына бөлүнөт. Атайын комиссия бул каражатты бөлүштүрүлөт. Ал үчүн өкмөттүн Ысык-Көл облусундагы ыйгарымдуу өкүлү жеке жоопкер болот. Бүгүн жөнөтүлгөн жардам калктын кыйын учурда бир-бирин колдоп турарын дагы бир жолу айгинеледи", — деди премьер-министр.

Өкмөттүн берген маалыматына ылайык, жер титирөөдөн жабыркаган Ысык-Көл облусуна Ош облусу – 713 миң сомдук жардам, Жалал-Абад – 700 миң сомдук жардам, Баткен облусу – 240 миң сомдук жардам, Чүй облусу – 860 миң сомдук жардам, Нарын облусу – 300 миң, Талас облусу – 400 миң жана Бишкек шаары 670 миң сомдук жардам жөнөткөн. Ал эми Өзгөчө кырдаалдар министрлиги баасы 815 миң сомдон ашык гигиеналык каражаттар менен жылуу төшөктөрдү берген. 

Белгилей кетсек, ноябрь айынын ортосунда Ысык-Көл облусунда жер титиреп, анда бир нече турак жай жабыркаган эле.

Жабыр тарткан аймакка депутаттар да айлыгынан каражат бөлүү маселесин карашууда.