БИШКЕК, 23-июн. — Sputnik. Улуттук банктын (УБ) төрагасы Толкун Абдыгулов депутаттын суроосуна жооп берип жатып, буга чейин дүйнөлүк банкта иштеп турганда 5 миң доллар маяна алып турганын билдирди.
Эске сала кетсек, учурда Жогорку Кеңеш УБнын 2015-жылдагы отчетун угуп жатат.
Сөз кезегин алган депутат Рыскелди Момбеков төрагынын маянасына кызыкты.
"Көп маяна аласыз. Сиз эмне президенттен да көп иштейсизби? Ошол айлык үчүн уялбайсызбы?" — деди Момбеков.
Абдыгулов эки мисал келтирип, жыйынтыкты өзүңүз чыгарып алыңыз деп жооп узатты.
"Мени бул кызматка атайын чакырышкан. Мурунку айлыгым 5 миң доллар эле. Учурда УБ төрагасы катары 120 миң сом алам. Орун басарларым 108 миң сомдон алат. Эми уялышым керекпи, жокпу өзүңүз жыйынтык чыгарыңыз", — деди УБ төрагасы.
Учурда жыйын уланууда.
