Миграция кызматы: ушу тапта Россияга кирүүгө 118 миң КР жаранына тыюу салынган

БИШКЕК, 31-мар. — Sputnik. Бүгүнкү күндө 118 миң кыргызстандык жаранга Россияга кирүүгө тыюу салынган. Бул тууралуу Мамлекеттик миграция кызматы билдирди.

Маалыматка ылайык, былтыркы жылдын соңунда Россиянын миграциялык мыйзамын бузгандардын саны 190 адамды түзгөн.

Үстүбүздөгү жылдын 1-кварталында Миграция кызматына 3000ге чукул кыргызстандык жаран кайрылып, анын 1487си Россиянын аймагына кирүүгө тыюу салынгандардын тизмесинен алып салуу боюнча арыз таштаган. Учурда бул арыздарды Россиянын Федералдык миграция кызматы карап жатат.

Россияга кирүүгө убактылуу тыюу салынып, бирок аталган өлкөгө барууга ниеттенген КР жарандары http://ssm.gov.kg/gu/view/13 сайтынан керектүү маалымат менен тааныша алат. 

Миграция кызматы бул тизмеден Россия жарандыгына ээ болгон туугандары бар адамдар, Россиянын окуу жайларында окуган студенттер, дарылануудагы жарандар тийиштүү документтерди көрсөтүү менен биринчи кезекте чыгарыларын эскертет.

Эмгек мигранттары "кара тизмеден" кантип чыга алат экенин Sputnik инфографикасынан көрө аласыздар>>