БИШКЕК, 7-мар. — Sputnik. ИИМдин маалымат кызматы "Чыгыш-5" кичи районунда атайын даярдыктагы ыкчам отряды тарабынан жасалган операция боюнча түшүндүрмө берди.
Маалыматка ылайык, 2016-жылдын 7-февралында Токмок шаарында Казаков аттуу жаранды уурдоо жана өлтүрүү фактысы боюнча Кылмыш жаза кодексинин 97-беренеси (адам өлтүрүү), 123-беренеси (адам уурдоо) боюнча кылмыш иши иликтенип жатат.
"2016-жылдын 3-февралында 25 жана 21 жаштагы эки жаран кармалган. Алар 7-февралда Казаковду атып, анын сөөгүн Жаңы-Турмуш айылынын жанындагы талаага алып барып көмүшкөн", — деп айтылат маалыматта.
Жекшемби күнү кылмышка шектүү жарандардын шериктери "Чыгыш-5" конушунда жүрөт деген маалыматка ылайык, ИИМдин атайын даярдыктагы ыкчам отряды тарабынан операция өтүп, анда уюшкан кылмыштуу топтун үч мүчөсү кармалган.
"Тинтүү учурунда Макаров маркасындагы номери өчүрүлгөн тапанча жана дагы маркасы белгисиз эки тапанча, тогуз миллиметрлик калибрдеги 36 ок, 14 травматикалык тапанчанын октору табылган", — деп билдирет маалымат кызмат.
Учурда кармалгандар ИИМдин кылмыш иликтөө башкы башкармалыгына өткөрүп берилди.
