БИШКЕК, 6-фев. – Sputnik. Ош технологиялык окуу жайында студенттен акча талап кылган мугалимге кылмыш иши козголду. Бул тууралуу Башкы прокуратуранын маалымат кызматы билдирди.
Маалыматка ылайык, Ош облустук прокуратурасына Ош технологиялык университетиндеги аскердик кафедрасынын кураторуна каршы студенттен арыз келип түшкөн.
Анда мугалим экзаменден өткөрүү үчүн студенттерден 2 миң 500 сом талап кылып жаткандыгы айтылган.
Ыкчам иликтөө иштеринин жыйынтыгында пара талап кылган куратор кармалып, Кылмыш жаза кодексинин 313-беренеси (пара талап кылуу) боюнча кылмыш иши козголду.
