БИШКЕК, 3-дек. — Sputnik. Бишкекте Кыргыз-россиялык өкмөт аралык соода-экономикалык, илимий-техникалык жана гуманитардык кызматташуу боюнча комиссиянын 18-жыйыны өтүп жатканын өкмөттүн маалымат кызматы билдирди.
Жыйын премьер-министр Темир Сариев менен РФ Федералдык бажы кызматынын жетекчиси Андрей Бельяниновдун төрагалыгы астында өтүүдө.
Иш-чарада алгач, аталган комиссиянын Москва шаарында былтыр өткөн 17-жыйынынын чечимдеринин аткарылышы тууралуу маалымат угулмакчы. Күн тартибинде энергетика, мунай зат, өнөр жай, транспорт, байланыш жана массалык коммуникациялар, агроөнөр-жай комплекси, өзгөчө кырдаалдардын алдын алуу, анын кесепеттерин жоюу, саламаттык сактоо, социалдык өнүктүрүү, билим берүү, илим, маданият, маалымат, жаратылыш пайдалануу жана бажы иши багытындагы кызматташуу маселелери каралат.
Кыргыз-россиялык өкмөт аралык соода-экономикалык, илимий-техникалык жана гуманитардык кызматташуу боюнча комиссия Бишкек шаарында 1997-жылдын 10-октябрында кол коюлган протоколго ылайык түзүлгөн.
Комиссиянын негизги милдети Кыргызстан менен Россиянын ортосундагы экономика, соода, илим жана технология, байланыш, маалымат, билим берүү, маданият жана туризм жаатындагы кызматташууну кеңейтүү болуп саналат.
