Касымова: Бишкек шаарында балдардын 41 пайызы гана бала бакчага барат
© Sputnik / Асель Сыдыкова
Жазылуу
Билим берүү жана илим министрлигинин мектепке чейинки билим берүү башкармалыгынын башчысы Нурзида Касымова учурда Бишкек шаарында балдардын 41 пайызы бала бакчага барарын айтты.
Учурда Бишкек шаарында 94 муниципалдык бала бакча бар. Аларда 22 миңден ашык бөбөк тарбияланууда. Дагы 28 миң 400 бала кезекте турат. Бул тууралуу Нурзида Касымова Sputnik Кыргызстан радиосунун эфиринде маек куруп жатып билдирди.
Касымова: Бишкек шаарында балдардын 41 пайызы гана бала бакчага барат
Анын айтымында, бала бакчалардагы орундарды көбөйтүү боюнча сынамык долбоорду ишке ашыруунун артында кичинекейлерди мектепке чейинки билим берүүгө камтууну 40 пайызга чейин жогорулатуу пландалууда.
"Президент Садыр Жапаровдун тапшырмасы менен Бишкек шаарынын мэриясы, министрлер кабинети жана Аймактарды өнүктүрүү фонду менен биргеликте сынамык долбоорду ишке ашырууну баштадык. Долбоор Билим берүү жана илим министрлигинин көмөгү менен Социалдык өнөктөштүк жана региондук өнүктүрүү фонду тарабынан сунушталган. Ага ылайык, Касым конушундагы №1 "Шоола" бала бакчасында бөбөктөрдүн мектепке чейинки билим берүүгө камтылышын жогорулатуу максатында сынамык долбоордун алкагында кошумча алты тайпа, мындайча айтканда 180 орун кошулду. Ошентип бул бакча 450 орундуу болуп калды. Долбоорго ылайык, анда жылма керебеттер колдонулат. Бул чечим мектепке чейинки жайдын чектелген аянтын майнаптуу кылып пайдаланууга мүмкүндүк берет. Кичинекейлердин уктоочу бөлмөлөрү эс алуу үчүн гана эмес, окуу жана ойноо үчүн да колдонулат. Кыргызстандагы бардык муниципалдык бала бакчаларда 5 549 уктоочу бөлмө бар экен. Ал эми Бишкектеги бул жайларда анын саны 566ны түзөт. Алдыда сынамык долбоорду республика боюнча жайылтсак, дагы 120 миӊ баланы мектепке чейинки билим берүүгө тартканга мүмкүнчүлүк пайда болот", — деди Касымова.
Ал Кыргызстанда бир жаштан алты жашка чейинки 960 миң бөбөк болсо, анын 740 миңге жакыны бала бакчага барбай турганын кошумчалады.
