БИШКЕК, 19-авг. — Sputnik. "Талибан"* кыймылы басып ала албаган Афганистандын Панджшер провинциясындагы аскердик күчтөр батыш өлкөлөрүн аларга курал-жарак жагынан жардам берүүгө чакырды. Бул туурасында талибдерге каршы күрөшүп жаткандардын лидери Ахмад Масуддун билдирүүсү Washington Post гезитине чыкканын РИА Новости билдирди.
Басылма "Талибанга"* тиш кайрагандардын лидери катары атаган "Түндүк альянстын" башчысы маркум Ахмад Шах Масуддун уулу экени маалым.
Кичүү Масуддун айтымында, АКШ жана анын союздаштары согуш талаасында Афганистандан жүз буруп кетип калды, бирок Америка азыр деле "демократиянын улуу арсеналы" болуп калышы мүмкүн.
"Дал ушул максатта Афганистандын Батыштагы достору Вашингтондо жана Нью-Йоркто конгресстин жана администрациянын (АКШ президенти Жо Байдендин — ред.) алдында бизди кубатташын сурайм. Мен окуу жайды бүткөн Лондондо ушул жазда атамды эскерип, Елисей талаасындагы аллеяга анын ысымын берген Парижди бизди жактап чыгышын сурайм", — деди Масуд.
Ошондой эле ал чакырыгынан кийин афган армиясынын аскерлери, атайын даярдыктагы отряд курал-жарак жана техникасы менен Панджшерди көздөй баратканын айткан.
"Кандай болгон күндө да, мен жана согушкер-моджахеддер афгандардын эркиндигинин акыркы чеби катары Панджшерди коргойбуз. Биздин аскердик дух табынан кайткан жок. Тажрыйбага таянып, бизди эмне күтүп жатканын билебиз. Бирок бизге көп курал, ок-дары жана жабдыктар керек", — деп айтылат билдирүүдө.
Панджшер Афганистанда "Талибан"* кыймылы басып ала албаган жападан жалгыз провинция (34 провинциянын бири). Ал жердин рельефи татаал, 140 миңден ашуун калк жашайт. Провинцияда АКШ башында турган НАТОнун негизги күчтөрү топтолуп турган.
Талибдер мындан 25 жыл мурун дагы Панджшерге үстөмдүк кыла алган эмес. Алар 1996-жылы бийликке келгенде "Түндүк альянстын" лидери Ахмад Шах Масуд ушул провинцияга баш калкалап каршылык көрсөткөн. Ал 1980-жылдары советтик аскерлерге да каршы согушкан.
