БИШКЕК, 3-июн. — Sputnik. Россиянын Финансы министрлигинин каржылык сабаттуулукту жогорулатуу долбоорунун эксперттери балага акча берүүнүн жолдору тууралуу ата-энелерге кеңеш берди.
Долбоордун директору Анна Зеленцова баланын мектепке чейинки курагында эле акча колдонууну үйрөтө берүү зарылдыгын РИА Новостиге билдирген.
"Ата-эне дүкөнгө барганда тыйындарды, купюраларды баласына эсептетип, сатуучуга берген акчанын кайтарымын алганга үйрөтүш керек. Оюнчук сатып берүүнү суранса, ага канча кетерин белгилеп, ата-энелер акчаны оңой эле жасап алгандай түр көрсөтпөй, иштеп таба турганын түшүндүрүүсү кажет", — деп айткан Зеленцова.
Ал эми долбоордун директорунун кеңешчиси Екатерина Лавренова акча сактоонун майда-барат жолдоруна да көңүл буруу зарылдыгын белгилеген. Дүкөнгө барганда алданып калбаш үчүн акчаны кантип сакташ керектигин да үйрөтүү абзел.
Ал эми "Канча жашынан тарта колуна акча кармата берсе болот?» - деген суроого: "Бирдиктүү эреже жок",- деп жооп берип, ар бир баланы өзүнчө кароо керектигин белгилеген. Ошол эле учурда биринчи класска баргандан тарта берүү туурараак экенин айткан.
