БИШКЕК, 28-апр. — Sputnik. Америкалык каарман кыз бөбөгүн өлүмдөн сактап калды. Бул тууралуу The Sun басылмасы жазды.
Полиция кызматкерлери үйдөн балдарды таап чыкканда үч жаштагы кыздын эрдигин баса белгилешкен. Полицияга балдардын чоң атасы чалып, уулунун талмасы кармап калганын айткан. Укук коргоо органдары көрсөтүлгөн дарекке келгенде үйдөн эки адамдын сөөгүн жана эки кичине баланын чогуу турганын табышкан.
Полициянын маалыматына ылайык, бөбөктөр ата-энесинин өлүмүнөн кийин үч күн жалгыз жатышкан.
"Биздин кичинекей периште өзүнүн жана бөбөгүнүн өмүрүн сактап калган. Чыныгы эрдик", — деген полиция кызматкери Морин Райан.
Дарыгерлер балдарды текшерип көрүп суусаганын, ачка калганын, бирок ден соолугу жалпы жонунан жакшы экенин айтышкан. Полиция кызматкерлери балдар ата-энесинин өлгөнүн көргөн эмес деп божомолдошууда. Кызынын айтымында, ал апасынын ыйлаганын жана кыйкырганын уккан.
Чоң атасы журналисттер менен сүйлөшүп жатып, баласынын тагдыры кейиштүү бүтсө да, неберелеринин келечеги жаркын болооруна ишенерин айткан.
