БИШКЕК, 18-сен. — Sputnik. Одесса шаарындагы лагерде чыккан өрттөн өзү жаракат алган кыз кичүү тайпадагы сегиз баланы сыртка алып чыкканга жетишкен. Бул тууралуу РИА Новости агенттиги жергиликтүү "Думская" басылмасына таянуу менен жазып чыкты.
"Өспүрүм кыз күйүп жаткан имараттын ичинен сегиз жаштан он жашка чейинки 8 баланы сыртка алып чыккан. Кыздын буту жана дем алуу органдары жабыркаган. Аны ооруканага алып келгенде эс-учун жоготкон. Учурда балдардын облустук ооруканасынын кайра жандандыруу бөлүмүндө, абалы туруктуу", — деп шаардык кеңештин депутаты Александр Иваницкий билдирди.
Балдардын "Виктория" лагеринде ишембиге караган түнү өрт чыккан. Ал жакта 150 бала болсо, анын 42си өрт жалмаган имаратта эле. Кырсыктын кесепетинен үч бала каза болуп, өрт коопсуздугун сактабоо беренеси боюнча кылмыш иши козголду.
