Кыргызстандык буддачылар Мьянма бийлигине ачык кат менен кайрылды

БИШКЕК, 9-сен. — Sputnik. Кыргызстандык буддисттер Мьянма бийлигине ачык кат менен кайрылды. Бул тууралуу Sputnik Кыргызстандын кабарчысына "Чамсен" буддистттик коомунун төрагасы Олег Цой билдирди.

Кайрылууну будда орденинин монахы Ниппондзан Мёходзи Алексей Шмыгля, Билим берүү академиясынын илимий кызматкери Урмат Калеев жана Олег Цой жазган.

"Биз Ракхайн штатынын түндүк тарабындагы аскердик аракеттерди токтотууга чакырабыз. Бул пландалган акция жана ал жакта күнөөсүз адамдар каза болууда. Кимдир бирөө мусулмандар менен буддисттердин ортосуна чыр-чатак салууга аракет жасап жатат. Вирата "будда монахынын" чагымчыл билдирүүсүн айрым ЖМКлар баардык буддачылардын позициясы катары көрсөтүүдө. Бирок бул андай эмес", — деди Цой.

Кат өлкөнүн башкаруучу партиясынын төрагасы Аун Сан Су Чжи менен Мьянманын Куралдуу күчтөрүнүн башчысы Мин Аунг Хлайнга жолдонгон.

Ракхайн штатында жергиликтүү жоокерлер менен коопсуздук күчтөрү август айынын соңунда атайын операция жүргүзгөн. Алардын айтымында, бул аракеттер рохинжа калкынын арасынан чыккан ислам согушчандарына каршы жасалган. Аларды Мьянма бийлиги Бангладештен көчүп келген мыйзамсыз мигранттар деп эсептеп, жарандык да  берген эмес. Расмий бийликтин айтымында, рохинжа согушчандарына каршы аракеттер алар 25-августта бир нече полиция постуна, казармага кол салгандан кийин башталган. Мында 400дөй адам каза болуп, ар кыл эсептөөлөр боюнча 146 миңден 300 миңге чейин адам Бангладешти көздөй качкан.

Мьянма бийлигинин мындай кадамдарын 9-сентябрда Нобель сыйлыгынын ээлери дагы сынга алды.