БИШКЕК, 23-мар. — Sputnik. Британиянын тышкы иштер министринин орун басары, депутат Тобиас Эллвуд теракт учурунда оор жаракат алган полициянын өмүрүн сактап калууга аракет кылганын The Telegraph басылмасы жазып чыкты.
Маалыматка ылайык, кырсык болору менен депутат жаракат алган полицияны жасалма дем алдырууга аракет кылган. Тез жардам кызматы келип, тик учак менен алып кеткенге чейин полиция кызматкеринин жанында болгон.
Hero MP in Parliament terror attack: Tobias Ellwood battled to save life of stabbed officer https://t.co/EXgSmxAUum pic.twitter.com/89KnK5fTyM
— Telegraph News (@TelegraphNews) 22 марта 2017 г.
"Бул орду толгус кайгылуу окуя. Аккан канды токтотуп, жасалма дем алдырууга аракет кылдым. Ал оор жаракат алып, көп кан жоготту", — деп Тобиас Эллвуд өзүнүн пикирин аталган басылмага билдирген.
Британиянын борбору Лондон шаарында кечээ теракт болуп, машина айдаган киши бир нече адамды жолдон коюп кеткен. Андан кийин полицияны бычак менен сайган. Акырында ал атып өлтүрүлгөн. Акыркы маалыматтар боюнча бул окуядан беш киши каза болуп, 40тай киши түрдүү жаракаттарды алган.
