БИШКЕК, 17-дек. — Sputnik. Бельгияда рождество жарманкелеринде теракт жасоону пландаган 10 бала кармалганын Laatste Nieuws гезитине таянуу менен РИА Новости жазып чыкты.
Бул маалыматты өлкөнүн федералдык прокурору Эрик Ван Дер Сипт да тастыктады. Анын айтымында, кармалган өспүрүмдөр террордук уюмдар тарабынан теракт жасоо үчүн даярдалган.
"Балдар интернет аркылуу адамды кантип өлтүрүү керектигин жана бомба жасоонун ыкмаларын үйрөнүп турушкан", — деп айтылат макалада.
Жума күнү Германиянын батыш аймагында жайгашкан Людвигсхафен шаарында 12 жаштагы ирактык бала рождествого арналган жарманкеде теракт уюштурууга аракет кылган. Өспүрүм жардыруучу затты иштетип, бирок ал жарылбай калган.
ЖМКлардын жазып чыкканына караганда аталган бала "Ислам мамлекетинин" согушкери тарабынан азгырууга дуушар болгон.
