БИШКЕК, 23-мар. — Sputnik. Брюсселдин аэропортундагы жардырууну Ибрагим жана Калим эль Бакрауи аттуу ага-инилер ишке ашырган. Бул тууралуу RTBF телерадиокомпаниясына таянуу менен РИА Новости билдирди.
Буга чейин бельгия полициясы жан кечтилер Завентам аэропортунун видеобайкоо камераларына түшүп калганы тууралуу айткан.
Маалыматка ылайык, бир туугандар Париждеги терактыларга да шектелип келишкен. Мындан тышкары, Калим эль Бакрауи жасалма документ менен Брюсселдин Форе коммунасындагы турак жайды ижарага алып жашап келген. Бул жерде 15-март күнү болжолдуу террорчулар менен полиция кызматкерлери атыша кеткен.
Эскерте кетсек, кечээ, 22-март күнү Бельгиянын борбор калаасы Брюссель шаарында аэропорт менен метронун эки станциясында беш ирет жардыруу болуп, андан 34 адам каза болгон. Кырсык кесепетинен дагы 250 киши ар кандай жаракат алган.
Терактылардын жоопкерчилигин "Ислам мамлекети" уюму мойнуна алган.
