БИШКЕК, 11-мар. — Sputnik. Афганистандын батышында төрт күндөн бери жүрүп жаткан топтордун кагылышуусунан "Талибан" радикалдык тобунун 150гө чукул согушкерлери өлтүрүлдү. Бул турасында Khaama Press жергиликтүү бийликтин өкүлүнө таянып кабарлады.
Буга чейин жергиликтүү бийлик талибандын ичинен эки топ дүйшөмбү күнү Герат провинциясынын Шинданд уездинде кагылышып кеткендигин жана андан 67 киши өлгөндүгүн билдирген.
"Талибандын" ичиндеги араздашуу 2015-жылдын июль айында "Умар молдо өлдү" деген кабардан кийин башталган. Анын ордуна Ахтар Мохаммед Мансур дайындалганы менен, талиптердин бир катар командирлери жаңы лидерди таануудан баш тарткан. Такталбаган маалыматтарга караганда, Умар молдо декабрь айында алган жараатынан каза болгон. "Талибан" Афганистан аймагында кыска мөөнөттө тарапкерлери өсүп кеткен "Ислам мамлекети" менен таасир талашып, атаандашып келет.
Бириккен Улуттар уюму өткөн жылдын декабрь айында "Талибан" тынчтыкты орнотууга көмөк көрсөткөн тараптардын бири катары таанылса гана, легитимдешүүсү мүмкүн экендигин билдирген.
