Үйдөн биринчи чек арага зым тартып бергилечи. Муңга толгон Максат айылынан видео

Жазылуу
Кыргыз-тажик чек арасындагы жаңжал 28-апрелде башталып, төрт күндөн кийин басылды. Лейлек районунун Максат айылына тажикстандыктар 29-апрелде кирген. Жашоочулар жарым саат мурун качып чыгууга үлгүргөн.
Sputnik Кыргызстан агенттигинин кабарчылары бүлүнүп, өрттөлүп, тонолуп ээн калган Максат айылынын азыркы көрүнүшүн тартып, жашоочулардын муң-зарын угуп келди.
Тургундар кайтып келип күлгө айланган турак жайын тиктеп отуруп калышты. Кээ биринин үйүн өрттөп гана тим болбой, дубалын түрттүрүп тегиздеп салышкан.
Тажик тараптын чабуулунан социалдык объектилер да талкаланган. Сегиз жыл мурун жаңы салынган Максат орто мектеби жарактан чыгып, ал жерден миномёттун октору табылды.
Бала бакчаны да өрттөп жиберишкен, фельдшердик-акушердик пунктунун, милиция бөлүмүнүн төрт дубалы гана калган.
Айыл тургуну Абдыкул Байзаков 10 жыл Россияда иштеп жүрүп там салган. Ал кол салгандар үйүн өрттөп, короосундагы малын, “Жигули” унаасын алып кеткенин айтат. Учурда анын эч бир мал-мүлкү калган эмес.
“Айыл башчыбыз “тез арада чыкпасаңар болбойт” деп WhatsApp тайпадан жөнөттү. Дароо бала-чаканы алып качтык, кийимдерди дагы албаптырбыз. Максат айылынын эңкейишине жеткенде чабуул башталды. Үйүм толугу менен күйүп кетиптир. Бизге үйдөн дагы биринчи кезекте чек арага зым тор тартып бериңиздер. Бул жерде жашоого болбой калды. Ушуну менен экинчи ирет качышыбыз”, — деди Байзаков.
Арка айылынын тургуну Гүлайым Добутова - Sputnik Кыргызстан, 1920, 01.05.2021
Арка айылынын тургуну Гүлайым: бир сутка талаада жаттык, кошуна эжем каза тапты
Биринчи вице-премьер Артем Новиков айылдагы бардык үйлөр, социалдык объектилер сентябрь айына чейин толугу менен калыбына келтирилерин убадалады.
Максат айылында 200дөй түтүн жашайт, 60тан ашуун үй күйгөн. Жолдун сол тарабында Тажикстандын, оң тарабында Кыргызстандын айылы жайгашкан. Ортосуна зым тартылып бөлүнгөн эмес.
Жалпы жонунан кыргыз-тажик чек арасынын узундугу 970 чакырымды түзөт, бүгүнкү күндө анын 504 чакырымы гана такталган. Эки өлкө эгемендүүлүк алгандан бери 70 талаштуу аймактын тагдырын чече албай келет.
Жаңылыктар түрмөгү
0