23:55 18 Кулжа 2021
Түз эфир
  • USD84.5723
  • EUR100.7425
  • RUB1.1710
Видео

Ок жааган үйлөр, баласын кучактап муңайган энелер. Баткендеги абалдын видеосу

Кыскача шилтеме алуу
Баткендеги кыргыз-тажик жаңжалы (298)
2645 0 0
© Sputnik / Эмиль Садыров

Бейшемби күнү кыргыз-тажик чек арасында чыр чыгып, ырбап кеткен. Жаңжал алгач Көк-Таш, Ак-Сай айылдарында чыккан. Sputnik Кыргызстандын кабарчылары дал ушул аймакка барып соңку кырдаалды тартып, жашоочулардын пикирин укту.

Баткен шаарынан чыгып Көк-Таш айылына кире берген жерде жолдун ортосунда катары менен Кыргызстандын номери тагылган үч жеңил унаа турат. Алар курал менен аткылаган. Ичиндеги адамдар тууралуу маалымат жок. Бирок кандын тактары, бут кийимдер калганын көрүүгө болот. Ал эми Lexus унаасын аскер техникасы менен тебелетип, тез жардам унаасын оодарып салышкан.

Жергиликтүүлөр дал ушул жерде тажик тарап кыргыз жарандарын өткөрбөй аткылаганын айтышты. Кээ бирлеринин үйүнө гранатомёт түшүп, жааган ок дубалын тешкен.

Көк-Ташка барып айыл тургундарынан бир гана Нурмат Маллаевди кезиктире алдык. Ал үй-бүлөсүн коопсуз жайга чыгарып кетүүгө үлгүргөнүнө кубанып турат, себеби жааган ок үйүнүн ичине чейин кирген.

"Бет маңдайыбыздагы үйлөрүндө туруп алып гранатомёт, миномёт, автомат бардыгы менен атышты. Жөнөкөй жарандарды дагы аяшкан жок. Дубалга эле 12 ок тийген, терезе аркылуу канча киргенин эсептей албайм. Фундаменттин чекесине гранатомёт түшүп, жарылган", — деди Маллаев.

Ал эми Ак-Сай айылында үйүн кайтарып жүргөн эркектерди көрүүгө болот. Аларга гуманитардык жардам иретинде тамак-аш алып келишүүдө. Ак-Сай аркылуу Лейлекке барса болот, бирок ары жакта ок атылып жатканын айтып аскерлер өткөргөн жок.

Кыргызстандын президенти Садыр Жапаров
© Пресс-служба президента КР / Султан Досалиев
Жаңжал башталарда аялдар менен балдарды эвакуациялап, Баткен шаарына алып келишкен. Учурда алар мектептердин спорт залында баш калкалап жатышат.

Мисалы, Жоомарт Бөкөнбаев атындагы мектепке 295 адам жайгаштырылган, анын 199у балдар. Бусайра Шарипова жалгыз өзү Ак-Сай айылынан качып келген, келини төрт баласын алып тоо тарапка, Рават айылына кеткенин айтат.

"Бири-бирибиз менен байланыша албайбыз. Балдарым, неберелерим эмне болду билбейм. Тоодо байланыш үзүлгөн. Бир туугандарыбызга, балдарыбызга чалсак "эски көпүрөнүн алдында отурабыз, эч жакка кете албайбыз" дешти. Ары жакка барайын дешсе жөн эле от чыгып жатыптыр", — деди Шарипова.

Аман Мамытов эки небересин ээрчитип Тоо-Шаңы жайлоосунан түшүп, шаардагы Ленин атындагы мектепке келген. Ал түнү менен тоо аралап жөө келгенин билдирди.

"Саат 7ден өткөндөн кийин дүк-дүк деди, алыстан каяктан билесиң кыргыз атып жатабы же тажик атып жатабы... Мен Ворухтун үстүндөгү жайлоодо жашайм. Кечээ жөнөгөм, бул жерге түштө келдим. Түндө жолдо жаттык", — деди Мамытов.

Белгилей кетсек, чек ара заставаларынын, турак үй, май куюучу жайлардын өрттөлүшү Лейлек районунун айылдарында болгон. Ал тарапка өтүү кооптуу болду.

Соңку маалымат боюнча, Баткендин Тажикстан менен чектешкен аймагындагы Төрт-Көчө жолу ачылып, каттам калыбына келди. Ок атуулар токтоп, абал турукташып жатканы, бирок чыңалуу бар экени белгиленди.

Чек ара чырынан 31 кыргызстандык набыт болуп, 154ү жаракат алды.

Тема:
Баткендеги кыргыз-тажик жаңжалы (298)

Тема боюнча

Баткенде абал турукташууда, Төрт-Көчө жолу ачылды. Соңку маалымат
Бишкектен Баткенге 100 тонна гумжардам жөнөтүлөт. Видео
Тажикстанда жүргөн кыргызстандыктар кайсы номерге чалып, жардам алса болот
Суваналиев: тажик аскерлери Баткендин жаңжал болгон аймагынан чыгып кетти
Белгилер:
атышуу, Ак-Сай, Көк-Таш, Жаңжал, чек ара, Баткен

Дагы видео

ЭҢ МААНИЛҮҮ