Жыйыл районундагы каракчылыкка шектелген жаран Бишкек шаарында кармалды. Анын үйүнөн курал-жарак табылганын шаардык милициядан билдиришти.
Маалымат кызматы 29 жаштагы шектүүнүн колго түшүрүлүп, суракка жеткирилген видеосун жарыялады.
"Ал бир нече жолу уурулук боюнча соттолгон. 2015-жылы Чаткал районунда, 2018-жылы Сокулук районунда эркинен ажыратылган. Ошондой эле жаза аткаруу жайынан качып кеткендиги үчүн кылмыш иши козголгон", — деп айтылат маалыматта.
Үйүн тинтүүдө бир тапанча, ок жана бычактар табылган.
