Чоң атам согуштан келген, азыр 101 жашта. Министр Бейшеновдун баяны

Жазылуу
Транспорт жана жолдор министри Жанат Бейшенов Sputnik уюштуруп жаткан "Фронт жаңырыгы" долбооруна катышты.

Бул долбоордо кыргызстандыктар жана жакынкы коңшулаш өлкөдөгүлөр Улуу Жеңиштин барк-баасын ага катышкан аталар, апалар жөнүндө урпактары эскерип айтып берет. Быйыл дүйнө Жеңиштин 75 жылдыгын белгилейт.

"Бул аталарыбыздын, совет элинин эрдигин унутта калтырбай турган эң сонун долбоор деп эсептейм. Аларды эч качан көңүлдөн чыгарбашыбыз керек. Балдарыбызга, кийинки муундарга адамзатка каршы мындай кылмыштар жасалбашы үчүн буга чейин тарыхта эмнелер болгонун айтып турушубуз керек", — деди министр сөзүнүн башында.

Ал Улуу Ата Мекендик согушка анын үч чоң атасы чакырылгандыгын, бирок алардын бирөө гана аман-эсен кайтып келгенин эскерди.

"Биздин үй-бүлөдө чоң атамдын атасы Егинбай Улуу Ата Мекендик согушка үч уулун бирдей жөнөтүптүр. Бейшен — менин өзүмдүн чоң атам жана анын эки бир тууганы — Өмүтай менен Айтикелер кеткен экен. Чоң атам Аламүдүн районунун Көк-Жар айылындагы комсомол уюмунун катчысы экен. Согушка 1943-жылы 3-январда кетип, Смоленск облусундагы Барсуки айылында согушуптур. Азыр ал жер Псков облусу. Ошентип, чоң атам курман болот. Анын алдында эле экинчи бир тууганы Өмүтай атам андан эки кат алат да, ошол бойдон кабар үзүлгөн…" — деп баяндады Бейшенов.

Айтике сапёр, минёр болуп жүрүп, 1945-жылы ал да курман болот. Бул кишинин өмүрү Жеңишке, 9-майга үч ай гана жетпей калыптыр.

Чоң атам Сталинград согушунда курман болгон. Министр Муканбетовдун баяны - Sputnik Кыргызстан
Чоң атам Сталинград согушунда курман болгон. Министр Муканбетовдун баяны
"Үч бир туугандын ичинен жалгыз гана Өмүтай чоң атам кайтып келген. 5-майда ал киши 101 жашка чыкты. Согуштун бардык апаатын башынан өткөрүп, Улуу Ата Мекендик согуштун жана эмгектин ардагери болду. Кыргыз ССРинин Министрлер Советинин аппаратынан пенсияга чыкты", — деди министр.

Бейшен Егиналиев абдан активдүү болгондугун небереси эскерет.

"Комсомол катчысы катары позицияларын Көк-Жар айылындагылар айтып калышат. Мен согушка катышкандарды, курман болгондорду, аман келгендердин баарын баатыр деп ойлойм. Улуу Ата Мекендик согуштун ар бир күнүндө жашап, тирүү калыш эрдиктин эрдиги болгон", — деп сөзүн жыйынтыктады Бейшенов.

Улуу Жеңиш күндүн алдында Sputnik редакциясынын Кыргызстандагы, Казакстан, Белоруссия, Абхазия, Армения, Молдова, Грузия, Азербайжан жана Түштүк Осетиядагы агенттиктери согуштун каармандарынын тарыхын жарыялайт.

Бул жоокерлер, офицерлер Белорусь, Балтика боюндагы, Кавказдагы, Түштүк жана дагы бир топ фронттордо салгылашкан.

Жаңылыктар түрмөгү
0