Граната ыргытып, автомат чогулткан окуучулар. Бишкекте аскердик сынак өттү

Жазылуу
Иш-чараны көрүүгө өлкө аймактарынан 180ге чукул окуучу келген.

Бишкек шаарынын мэриясы калаанын 140 жылдыгына карата мектеп окуучулары арасында "Эр жигит" аттуу аскердик-спорттук сынагын өткөрдү.

Иш-чараны көрүүгө өлкөнүн Кочкор, Нарын, Чолпон-Ата, Чоң Кемин, Кичи Кемин сыяктуу райондорунан 180ге чукул окуучу келген. Ал эми аскердик-спорттук сынакка Бишкек шаарындагы мектептердин окуучу балдары гана катышты. Мэрия кызматкерлеринин айтымында, сынак калаанын 140 жылдыгына карата уюштурулган.

Өзгөчө кырдаалдар министрлигинин Бишкек шаардык башкармалыгынын Куткаруу кызматында иштеген Теңиз Турсунбеков - Sputnik Кыргызстан
Куткаруучу Турсунбеков: жарылган учактагы үч кишинин сөөгүн беш саат чогулттук
"Жаш карек" деген атайын окуучулардын долбоору бар. Анын алкагында жылына бир же эки жолу өлкө аймактарынан балдарды чогултуп түрдүү иш-чараларды уюштуруп турабыз. Бул жолу балдардын патриоттук сезимин күчөтүү максатында аскердик сынак өткөрүүнү туура көрдүк. Мелдеште шаардык окуучулар аралыкка чуркоо, граната ыргытуу, автомат чогултуу, оор салмак көтөрүү сбоюнча күч сынашат", — деди мэриянын социалдык бөлүмүнүн башкы адиси Жамийла Абирова.

Мелдеш аяктаган соң уюштуруучулар аймактардан келген окуучуларды Ата-Бейит мемориалдык комплексине алып барып, гүл коюу аземин уюштурат. Андан соң шоу-бизнес ырчылары менен да жолугушуу кечесин өткөрөрүн кошумчалашты.

"Мындай жолугушуу мектеп окуучулары үчүн абдан керек. Шаардын балдары менен аймактардын балдары таанышат, пикир алышат. Ошондой эле алар үчүн стимул болсун деп бирде депутаттар менен жолугуштурсак, бүгүн минтип аскерлердин жашоосун көрсөтүп жатабыз", — деди Абирова.

Аскердик форма кийип, колуна автомат көтөрүп мекен сакчысы болоруна кубанган балдар улам-улам сүрөткө түшүп, иш-чара жакканын айтышты.

Жаңылыктар түрмөгү
0