Шаршенов 2006-жылы Кыргызстандан Астанага көчүп келип, бир катар билим берүү мекемелеринде мугалим болуп эмгектенген. Өткөн жылдан тарта "Кыргызстан — Астана" улуттук маданий бирикмесинин "Жекшемби мектебинде" кыргыз мигранттардын балдарына кыргызча үйрөтө баштады.
"Астанада 15 жылдан бери иштейм. Шаарда 80ден ашык мектеп бар. Гали Орманов атындагы №7 мектеп-гимназиясын тандап алганыбыздын себеби базарга жакын. Анткени соода-сатык тармагында иштеген кыргыз мигранттары дал ушул мектептин тегерегинде жашайт. Аталган мектепте 300дөн ашык кыргыз балдар окушат", — деди ал.
Ал эми жогорудагы мектепте окуган жүздөгөн кыргыз балдардын ичинен туруктуу жашаган 30га чукул бала жекшемби мектебине тандалып алынганын белгиледи.
Жекшемби мектебинде кыргыз тилинен сырткары Манас таануу, кыргыз бийи, улуттук музыкалык аспаптар, кол өнөрчүлүк ийримдери да бар.
