22:44 04 Баш оона 2020
Түз эфир
  • USD76.9120
  • EUR90.7023
  • RUB1.0481
Видео

Энесин ала качып кетишкен: 6 жашар бала оорулуу таянеси менен бөбөгүнө тамак жасап берет

Кыскача шилтеме алуу
12717201
© Sputnik / Эркин Алымбеков

Чүй облусунун Кайыңды шаарындагы бул аялдын буту баспайт. Башка бирөөлөргө арыз-муңун айткандан жазганат, себеби, социалдык атайы кызматтар неберелерин алып кетип калат деп коркот.

Кайыңды шаарында бир үй-бүлө жашайт, жетиге эми толоюн деген эркек бала менен төрт жашар кыз. Буларга баш-көз болгон адам буту баспаган, майып таянеси. Мурда булар төртөө болучу, оокаттын айынан энеси Бишкекке акча табам деп кетип, эми андан дайын жок. 

"Кызым жегенге тамак-ашыбыз жок калганда Бишкекке акча табам деп кеткен. Көпкө чейин жоголуп кетти. Бир күнү эле мени ала качып кетишти, күйөөгө тийдим деп телефон чалды. Тоолордун арасында жашап жүрөм, кантип чыгарымды билбей жатам дейт. Токтогулдамын деди окшойт. Эми ал чоң эле аял да, эмне кыларын өзү билет эмеспи", — деди улгайган аял. 

Ал башка бирөөлөргө арыз-муңун айткандан жазганат, себеби, социалдык атайы кызматтар неберелерин алып кетип калат деп коркот. 

"Өз алдымча да, таяк менен да баса албайм. Жардам сурап да эч жакка арызданып, кайрылгым келбейт. Неберелеримди алып кетип калышсачы. Анда өлүп калам го… Мени өлтүрүп эле алып кетишпесе, эч кимге бербейм. Кол куушуруп да отуруп калгым келбейт. Квартирамды сатайын дегем, бирок, болбой жатат. Сатып, кичи мекениме, Таласка кетсем деген оюм бар", — деди балдардын таянеси.

Балдардын таянеси коомчулукка чыккысы келбей, бирок, кызы бул видеону көрсө, кайтып келип калабы деген үмүт менен биз менен сүйлөшүүгө макул болду.

Азырынча ага кошунанын кызы менен улуу небереси каралашып жатат. Бала тамак жасаганды үйрөнүп алыптыр. Баарынан картошканы жакшы куурат экен. Эми нан жасаганды үйрөнө баштаптыр. 

Материалды жарыялар алдында аны менен байланышканыбызда, жей турган азык-түлүгү түгөнгөндүгүн айтты.

Тема боюнча

Үмүтсүз — шайтан… Баспай калган 12 жашар Тилек далай дабанды ашарына көзү жетет
Белгилер:
тагдыр, кыз ала качуу, балдар, акча, Кайыңды

Дагы видео

ЭҢ МААНИЛҮҮ