Жээнбеков спортчуларды куттуктап, Олимпиада оюндарына катышуу боюнча айтты

Жазылуу
Президент спорт жаатындагыларга бекем ден соолук, бакубатчылык жана албан ийгиликтерди каалаган.

БИШКЕК, 6-апр. — Sputnik. Президент Сооронбай Жээнбеков дене тарбия, спорт кызматкерлеринин күнү менен куттуктап, 2020-жылы өтө турган Олимпиада оюндарына катышуу үчүн лицензия жеңип алуу кыргыз спортчуларынын маанилүү милдети экенин айтты. Бул туурасында мамлекет башчынын маалымат кызматынан кабарлашты.

Ал дене тарбия жана спорт кызматкерлерине, спортчуларга, машыктыруучуларга, ардагерлерге кайрылып, Кыргызстанда спорт ышкыбоздорунун саны улам көбөйүп баратканына кубана турганын билдирген.

"2020-жылы өтө турган Олимпиада оюндарына татыктуу даярданып, ага катышуу үчүн лицензияларды жеңип алуу — кыргыз спортчуларынын маанилүү милдети. Биз сиздерге ишенебиз, жаңы жеңиштерди күтөбүз. Сиздердин жеңиш — Кыргызстандын аброю жана элибиздин сыймыгы", — деди Жээнбеков.

Президент Сооронбай Жээнбеков Кыргызстандын футбол курама командасы менен жолугушуу учурунда. Архив - Sputnik Кыргызстан
Президент: футболчуларыбыз Кыргызстандын атын дүйнөгө даңазалап жатат
2018-жылы спорт чеберлери 415 медаль жеңип алган. Ал эми XVIII Азия жайкы оюндарында кыргыз спортунун тарыхында биринчи жолу 3 алтын, 5 күмүш, 12 коло медаль утуп келишкен.

Азия чемпионатында Кыргызстан грек-рим күрөшү боюнча жалпы командалык эсепте биринчи орунду ээлеген.

"Жакынкы жылдары өлкөбүздүн аймактарында жаңы спорттук объектилерди, Бишкек шаарында көп функционалдуу футбол стадионун куруу, ат майданын оңдоо боюнча чоң долбоорлор ишке ашырыла баштайт", — деди мамлекет башчы.

Кайрылуунун аягында президент спорт жаатындагыларга бекем ден соолук, бакубатчылык жана албан ийгиликтерди каалаган.

Жаңылыктар түрмөгү
0