Мындан улам Sputnik Кыргызстан маалымат агенттигинин журналисти Гүлдана Талантбекова кыргыздын атын далайга таанытып жүргөн жаш мушкерлерди тизмектеди.
Валентина Шевченко
Шевченко тай боксу жана К-1 версиясы боюнча дүйнөнүн 17 жолку чемпиону, тай боксу боюнча аялдар арасында дүйнөнүн мыкты спортчусу наамынын ээси. 2015-жылдан бери UFC уюмунда төрт беттеш өткөрүп, үчөөсүндө жеңип, бирөөсүндө утулуп калган. UFC уюмунун 62 килограммга чейинки салмак категориясынын рейтингинде 1-орунда.
Мыктыбек Мамасалиев
Мамасалиев спорт сүйүүчүлөрүнүн арасында "Ак аюу" каймана аты менен белгилүү. Ал атаандаштарын көпкө кармабай терең нокаутка кетирген сапаты менен эсте калат. 14 жашынан тарта бокс менен машыга баштаган. "Жаш күч" спорт клубунун мүчөсү, машыктыруучусу — Замир Сыргабаев.
2008-жылы ММА турниринде Евразия чемпиону, бокс боюнча КРдин үч жолку чемпиону, 2015-жылы Молдовада өткөн ММА турниринде дүйнө чемпиону аталган. Sherdog көрсөткүчү 10-2-0.
Самат Эмилбеков
ММА боюнча Кыргызстандын эки жолку чемпиону. 2013-2014-жылдары кулатуу эр таймаш боюнча Кыргызстандын чемпиону. Азия чемпионатынан экинчи орунду алган. WEF турниринин бир нече жолку чемпиону. Кулатуу эр таймаштын эл аралык класстагы чебери. Sherdog көрсөткүчү 10-3-0.
Тилек Батыров
Спортту мектепте окуп жүргөндө грек-рим күрөшү менен баштаган. 2008-жылы Россияга иштегени барып, ал жактан "Жаш күч" спорт клубунда машыгуусун уланткан. Каймана аты — "Баатыр". Машыктыруучусу — Айбек Мусаев.
"Time to fight" турниринин бир нече жолку чемпиону, эл аралык Corona Cup — 2013, Fight Nights — 2014, Tech Kreep Prime — 2014, Alash Pride — 2015, Kunlun Fight — 2015 турнирлеринин жеңүүчүсү. JFC уюмунун чемпиондук курунун ээси. Sherdog көрсөткүчү 10-3-0.
Данияр Бабакулов
2011-жылы КРдин самбо чемпиондугунда 2-орун, 2015-2016-жылдары катары менен эл аралык турнирлердин жеңүүчүсү болгон. Үч ирет КМШ кубогун багындырган. 2016-жылы JFC уюмунун бел курун тагынган. Sherdog көрсөткүчү 9-6-0.
Актилек Жумабек уулу
Актилек "Алгыр" каймана аты менен белгилүү. Спорт тармагына келишине агасы себепкер болгон. Эркин күрөш, тай бокс менен баштаган. Машыктыруучусу — Эмил Токтогонов.
Эркин күрөш, тай бокс менен машыгып жүрүп 2009-жылы ММАге аралашып, 5 ирет өлкө чемпиондугун багындырган. 2012-жылы Азия чемпиону, Казакстанда өткөрүлгөн панкратион оюндарынын кубогунун ээси. 2013-жылы Грэпплинг боюнча дүйнө чемпиону. Sherdog көрсөткүчү 8-6.
Тилек Машрапов
2014-жылдан бери эрежесиз эр уруш менен профессионалдык деңгээлде машыгып келет. "Жаш күч" спорт клубунда машыгат, устаты —Айбек Мусаев.
2015-жылы ММА чемпиону, "Time to fight" турниринин үч жолку жеңүүчүсү. Ошондой эле КМШ жана эл аралык турнирлерди бир нече жолу уткан. Sherdog көрсөткүчү 8-2-0.
Барчынай Узгенбаева
Жеке кармаш боюнча КРдин спорт чебери. Спорттун ар кыл түрү менен алектенет. Грэпплинг, дзюдо, таэквандо боюнча КРдин чемпиону. ММА боюнча профессионалдуу беттештердин жеңүүчүсү.
Бусурманкул Абдубаитов
2011-жылы "Локомотив" (мурдагы – FighterKG) спорт клубуна келген. Эки жылдан кийин Uni Fight версиясында дүйнө чемпиону, Кыргызстандын бир нече жолку чемпиону аталган. WEF турниринин аркасы менен Sherdog көрсөткүчүн бир нече ирет толтурган. Sherdog көрсөткүчү 8-2.
Канат Келдибеков
2007-жылы агасынын сунушу менен бокска келип, 2011-жылы эрежесиз эр мушташка аралашкан. Сырткы келбетинен улам "Тайсон" каймана атына ээ болгон.
Эрежесиз эр уруш боюнча Кыргызстан чемпиону, Евразия кубогунун, Евразия титулунун ээси, Чолпон-Атада өткөн ММА турниринин жеңүүчүсү. Sherdog көрсөткүчү 6-2-0.
Бегимжан Касымова
1995-жылы Бишкек шаарында туулган. Кыргыз мамлекеттик курулуш, транспорт жана архитектура университетинин архитектура факультетин бүтүрүп, учурда ошол эле окуу жайдын эсепчи бөлүмүнөн билим алат. Азырынча турмушка чыга элек.
Касымова эрежесиз эр уруш, кол кармаш боюнча чебер аталып, үч жолу Кыргызстандын чемпиону аталган. Ошондой эле бокс чеберине талапкерлигин коюп, эки жолу өлкө чемпиондугун багындырган. WEF Proffight турниринин жеңүүчүсү. Машыктыруучусу — Эмил Токтогонов.
