"Алтын топ": КР командасынын капитаны жана машыктыруучусу кимге добуш берди

БИШКЕК, 23-ноя. — Sputnik. Кыргызстандын улуттук курамасынын башкы машыктыруучусу Александр Крестинин жана учурдагы команданын капитаны Ислам Шамшиев дүйнө боюнча ушул жылдын мыкты оюнчу жана мыкты машыктыруучусун аныктоо үчүн добуш беришти. Бул тууралуу КРдин Футбол федерациясы билдирди.

Алардын добушу "Алтын топ – 2016" ээсин тандоодо эсепке алынат. Крестининдин пикирине караганда ушул жылдын мыкты оюнчусу Лондондун "Арсенал" жана Германия курамасынын жарым коргоочусу Месут Озил болуп саналат. Машыктыруучу экинчи орунду "Реалдын" чабуулчусу жана Португалиянын курамасындагы Криштиану Роналдуга берди. Ошондой эле ал дүйнөдөгү мыкты оюнчу катары Лионель Мессини атады.

Крестинин FIFA версиясы боюнча сурамжылоодо ушул жылдын мыкты машыктыруучусу катары биринчи орунга "Бавариянын" мурдагы устаты жана "Манчестер Ситинин" учурдагы машыктыруучусу Хосеп Гвардиоланы койду. Экинчи орунду Маурисио Почеттиного ("Тоттенхэм"), үчүнчүнү Диего Симеонеге ("Атлетико Мадрид") берди.

Ал эми Ислам Шамшиев 2016-жылдын мыкты машыктыруучусу катары Хосеп Гвардиоланы атап, экинчиликке Зинедин Зидан ("Реал"), үчүнчү орунга болсо Португалиянын курамасынын машыктыруучусу Фернанду Сантушту татыктуу деп атады.

2016-жылдын мыкты футболчусуна "Алтын топту" жана мыкты машыктыруучуга, эң кооз гол киргизген авторго байге берүү аземи кийинки жылдын 9-январында Цюрихте өтөт.