БИШКЕК, 17-сен. — Sputnik. Кыргызстандык Айпери Медет кызы жана Назира Марсбек кызы дүйнөлүк чемпионатта кадеттер арасында (16-17 жаш) күмүш жана коло медаль багындырышты. Бул тууралуу мелдештин расмий сайтында маалымдалды.
Айпери Медет кызы 70 килограмм салмак категориясында беттешип, үч ирет каршылашын жеңип, финалга чыккан. Финалда ал япониялык Ясуха Матсуюки аттуу спортчу менен чыгып, 7:2 эсебинде ага утулуп калды. Ошентип кыргызстандык кыз күмүш медалга ээ болду.
Дагы бир кыргызстандык Назира Марсбек кызы 52 килограмм салмак категориясында Пуэрто-Рикодон келген Андрибет Ривера Беллиард аттуу спортчу менен беттешип коло медалды жеңип алды.
Буга чейин турнирде Мээрим Жуманазарова Кыргызстан курама командасынын эсебине коло медаль алып келген болчу.
