БИШКЕК, 9-май — Sputnik. Улуу Жеңиштин урматына уюштурулган көк бөрү турнирин "Сары-Өзөн" командасы утуп алды.
Финалдык оюн борбордогу "Ак кула" ат майданында өтүп, анда "Сары-Өзөн" командасы менен "Достук" биринчиликке ат салышты. Оюн 3:1 эсебинде чүйлүктөрдүн пайдасына аяктап, "Сары-Өзөн" командасы мыкты аталды.
Үчүнчү орунду "Талас" командасы ээледи. Ал "Кең Таласты" 5:0 эсебинде уткан.
Эскерте кетсек, турнирдин жарым финалдык оюндары 7-май күнү "Ак кула" ат майданында өтүп, анда "Сары-Өзөн" командасы "Кең Таласты" 10:2 эсебинде утуп алса, "Талас" командасы 2:4 эсебинде "Достуктан" жеңилүү ызасын тарткан.
Мелдеш Жеңиш күнүнүн урматына уюштурулуп, СССРдин Эл артисти Сүймөнкул Чокморов жана белгилүү каскадёр Үсөн Кудайбергеновдун элесине арналган.
