БИШКЕК, 24-мар. — Sputnik. Кыргызстандын курама командасы башкы машыктыруучу Александр Крестининдин жетекчилиги менен шаардын Эркиндик проспектисинде ачык машыгуу өткөрө турганын Футбол федерациясы билдирди.
Жолугушуу 25-март күнү саат 12.00дө болот. Ушу тапта кыргызстандык футболчулар 2018-жылы өтө турган Дүйнө чемпионатынын тандоо турунун алкагындагы Тажикстан менен беттешүүгө даярданып жатат.
"Жолугушууга бардык каалоочулар келип, сүрөткө түшүп, кол тамга алып, баарлаша алат", — деп айтылат билдирүүдө.
Кыргызстандык команданын эсебинде учурда 11 упай бар. "В" тайпасында биринчи орунда 15 упай менен Австралия келе жатат, Иордания 13 упай менен экинчи орунда. Улуттук команда үчүнчү катарда. Ал эми Тажикстан беш упай менен төртүнчү, Бангладеш бир упай менен бешинчи орунда келе жатат.
2018-жылы өтө турган Дүйнө чемпионатынын финалдык бөлүгү Россияда өтөт.
