БИШКЕК, 7-окт. — Sputnik. Кыргызстан менен Тажикстан командаларынын беттеши учурунда 4 миңдей милиция кызматкерлери Дөлөн Өмүрзаков атындагы стадиондогу коопсуздукту камсыз кылышат. Бул тууралуу Бишкек ШИИБден билдиришти.
Бейшемби күнү кечки саат 8.00дө Бишкек шаарындагы Дөлөн Өмүрзаков атындагы стадиондо Кыргызстан менен Тажикстан курама командалары 2018-жылы болуучу Дүйнөлүк чемпионаттын тандоо раундунун алкагында беттешет.
Милиция кызматкерлери коопсуздукту толук камсыздоо үчүн стадионду тышынан, ичинен жана күйөрмандар отурган орундуктарга чейин күзөтөт.
Футбол командаларынын коопсуздугун камсыздоо үчүн түшкү саат 2.00дөн тарта стадионго жакын бир катар көчөлөр жабылат. Алар:
- Эркиндик проспектинен Исанов көчөсүнө чейинки Чүй проспекти,
- Жибек-Жолуна чейинки Исанов көчөсү,
- Исанов көчөсүнөн баштап Эркиндик проспектине чейинки Жибек-Жолу проспекти
- Жибек-Жолунан баштап Чүй проспектине чейинки Эркиндик проспекти жабылат.
Жол кайгуул кызматынан билдиришкендей, стадионго жакын аймакта бул күнү 50 инспектор иштейт.
