Айзаданын өлүмү боюнча милиционерлердин иши токтотулдубу? Прокуратуранын жообу

© Sputnik / Жоомарт Ураимов Милиция кызматкеринин фуражкасы. Архив
Милиция кызматкеринин фуражкасы. Архив - Sputnik Кыргызстан, 1920, 15.09.2021
Жазылуу
Буга чейин айрым ЖМКлар Айзада Канатбекованын иши боюнча милиция кызматкерлерине карата өндүрүш иши токтотулганын жазып чыгышкан.

БИШКЕК, 15-сен. — Sputnik. Уурдалып, өлтүрүлгөн Айзада Канатбекованын өлүмү боюнча милиция кызматкерлерине карата сотко чейинки өндүрүш иши тергелип жатат. Бул тууралуу Башкы прокуратуранын маалымат кызматы кабарлады.

Буга чейин айрым ЖМКлар Айзада Канатбекованын иши боюнча милиция кызматкерлерине карата өндүрүш иши токтотулганын жазып чыгышкан. Прокуратура бул маалымат чындыкка дал келбей турганын билдирди.

"2021-жылдын 8-апрелинде Бишкек шаарынын прокуратурасы тарабынан Жазык кодексинин 331-беренеси (“Шалаакылык”) менен Биринчи май райондук ички иштер башкармалыгынын кызматкерлерине карата сотко чейинки өндүрүш иши катталган. Азыркы тапта бул иш боюнча УКМКнын Бишкек шаарындагы башкы башкармалыгы тергөө жүргүзүп жатат. Ал прокуратуранын көзөмөлүндө", — деп айтылат маалыматта.

Айзаданын өлүмү

Үстүбүздөгү жылдын 5-апрель күнү эртең менен саат 07:00дөр чамасында Медеров жана Тыныстанов көчөлөрүнүн кесилишинен үч жаран 27 жаштагы кызды кызыл түстөгү автоунаага салып кеткен. Кыздын туугандары ошол эле күнү издеп баштап, Биринчи май райондук милицияга саат 07:30да кабарлашкан. Бирок издөө иштери кечеңдеп жатканына нааразы болуп, эртеси ЖМКларга кайрылышкан.

Ала качуу салт эмес! Кыз тагдырын талкалаган жорук тууралуу тасма - Sputnik Кыргызстан, 1920, 27.05.2021
Ала качуу салт эмес! Кыз тагдырын талкалаган жорук тууралуу тасма
7-апрелде изделип жаткан автоунаа Бишкектин чет жагындагы Арашан менен Чокморов айылдарынын ортосунан табылган. Ал тууралуу милицияга жергиликтүү чабан кабар берген.

Автоунаанын ичинен киши колдуу болгон Айзада Канатбекованын жана 36 жаштагы кишинин бычакталган сөөгү табылган. Канатбекованы уурдаган Замирбек Теңизбаевге башында Жазык кодексинин 175-беренеси ("Адамды никеге туруу максатында уурдоо") менен иш козголуп, кийин 170-беренеге ("Адам уурдоо") өзгөртүлүп, андан соң 130-берене ("Киши өлтүрүү") кошулган. Бирок шектүү көз жумганына байланыштуу кылмыш иши токтотулган. Кызды ала качууга катыштыгы бар делип беш киши кармалган. Бешөө тең күнөөлүү деп табылып, экөө алты жыл алты айга, үчөө жети жылга эркинен ажыратылды.

Айзада Канатбекованын өлүмү боюнча кызматтык иликтөөнүн натыйжасында Бишкек ШИИБдин жана Биринчи май райондук милициясынын начальниктери баш болгон бир катар жетекчилер кызматтан алынган.

 

Жаңылыктар түрмөгү
0