12:38 23 Аяк оона 2021
Түз эфир
  • USD84.8000
  • EUR99.5001
  • RUB1.1635
Коом
Кыскача шилтеме алуу
94 0 0

Борбордо беш ай ичинде ичеги-карын инфекциясына 799 киши кабылды, былтыр ооругандар 600 болчу. Мэрия шаардыктарды өз алдынча дарыланбай ооруканага кайрылууну эскертүүдө.

БИШКЕК, 9-июн. — Sputnik. Бишкек шаарында курч кармаган ичеги-карын инфекциясы көбөйгөнү байкалууда. Бул тууралуу муниципалитеттин маалымат кызматы кабарлады.

Калаанын санитардык-эпидемиологиялык көзөмөл борборунун маалыматы боюнча, беш ай ичинде ичеги-карын инфекциясына 799 киши кабылган, былтыр ооругандар 600 болчу. Илдет 29,9 пайызга өскөнү белгиленет.

Ошондой эле этиологиясы белгисиз энтериттин 723 учуру катталды. Ал 2020-жылы 518 адамда аныкталган, натыйжада быйыл 34 пайызга жогорулады.

"Мындан тышкары, курч дизентерия оорусу 40 пайызга өскөн. Аны менен көбүнчө эки жашка чейинки балдар оорушат. Буга баланы караган ата-эненин жеке гигиенаны сактабагандыгы, тамак-ашты туура эмес сактап, колдонгону себеп. Оорулардын көбү калаанын конуштарында катталууда. Ошондой эле акыркы жумада Шаардык балдар клиникалык тез жардам ооруканасында ичеги-карын инфекциясынын белгилери менен бөбөктөр көбөйдү", — деп айтылат маалыматта.

Шаардык саламаттык сактоо башкармалыгы калаадагы жугуштуу оорулардын учурдагы абалы боюнча кеңешме өткөргөн. Жыйынтыгында Үй-бүлөлүк медицина борборлорундагы тиешелүү пунктулардын ишин күчөтүү, курч ичеги-карын инфекциясын алдын алуу жана жеке гигиена боюнча түшүндүрүү иштерин жүргүзүү тапшырмасы берилген.

Мэрия шаардыктарды өз алдынча дарыланбай ооруканага кайрылууну эскертти.

Тема боюнча

Бишкектеги ашканадан 22 киши тамакка ууланып ооруканага түшкөн
Белгилер:
Бишкек, мэрия, инфекциялык оору, оору

ЭҢ МААНИЛҮҮ