Чек ара чырында жабыркагандардын документтерин калыбына келтирүү иши башталды

© Sputnik / Эламан Карымшаков Баткен облусундагы кыргыз-тажик чек ара чатагынан улам үйүнөн эвакуацияланган жарандар
 Баткен облусундагы кыргыз-тажик чек ара чатагынан улам үйүнөн эвакуацияланган жарандар - Sputnik Кыргызстан, 1920, 03.05.2021
Жазылуу
Жер-жерлерде мобилдик калкты тейлөө борборлору уюштурулары айтылды. Анда жарандардын бардык документтери калыбына келтирилет.
БИШКЕК, 3-май — Sputnik. Мамлекеттик каттоо кызматы Баткен облусундагы кыргыз-тажик чек ара чатагында жапа чеккен жарандардын жоголгон же жабыркаган документтерин калыбына келтирет. Бул тууралуу 3-майда медиа-штабда өткөн маалымат жыйында Мамлекеттик каттоо кызматынын төрагасы Акын Мамбеталиев билдирди.
"Мамлекеттик каттоо кызматынын төрагасынын орун басары Залкарбек Карыбеков жана Калкты каттоо департаментинин директору Махабат Пратова Баткен облусунда жүрүшөт. Алар жергиликтүү бийлик органдары менен биргеликте документтерин калыбына келтирүүгө муктаж жарандардын тизмесин түзүшүүдө", — деди ал.
Баткендеги кыргыз-тажик чек ара жаңжалында тажикстандыктар үйүн өрттөп жиберген аял - Sputnik Кыргызстан, 1920, 03.05.2021
Катуудан казаны, жумшактан күлү... Кан төгүлгөн чек ара жаңжалынан 18 ирмем
Мындан тышкары, Мамкаттоо кызматы жер-жерлерде мобилдик калкты тейлөө борборлорун уюштурары айтылды. Анда жарандардын паспортун, туулгандыгы, никелешкендиги тууралуу күбөлүктөрүн, үй, унаа жана башка документтерин калыбына келтирүү үчүн керектүү бардык техникалык жабдыктар менен камсыздалат.
Толугураак маалыматты Мамкаттоо кызматынын 119 номери аркылуу алууга болот.

Баткендеги кандуу кагылыш

Адам өлүмүнө алып келген Баткендеги кандуу кагылышуу 28-апрель күнү кечинде башталып, ок атылып, калаба 2-3 күнгө созулуп кетти. Натыйжада 35 кыргызстандык жаран көз жумуп, 150гө чукул киши октон, таштан жаракат алып ооруканага түштү. Он миңдеген адам эвакуацияланып, жанын арачалап турак жайын таштап кетүүгө аргасыз болду. Баткен менен Лейлек райондорунун чек арага жакын жайгашкан айылдары өрттөнүп, үйлөр, социалдык объектилер бүлгүнгө учурады.
Баткен облусундагы чек ара чатагынан жабыркаган турак үй - Sputnik Кыргызстан, 1920, 03.05.2021
Чек ара чатагынан келтирилген зыяндын көлөмү. Алдын ала маалымат
1-майдан тарта эки тараптуу сүйлөшүүлөрдөн кийин абал турукташа баштап, чек ара тилкесине тартылган аскер техникасы, күч түзүмдөрү чыгарылды. Ушу тапта аймакта кырдаал тынч, тургундар айылга кайтып, КР бийлиги келтирилген зыяндын көлөмүн эсептеп жатат. Үй-жайсыз калгандарды там-таш менен камсыздоо милдети өкмөттүн мойнунда.
Ал эми Тажикстандын бийлиги тараткан маалымат боюнча, кагылышуудан 16 киши набыт болгон.
Баткенде учурда эмне болуп жатканын Sputnik агенттиги жүргүзгөн онлайн-репортаждан билүүгө болот.
Жаңылыктар түрмөгү
0