Куткаруучуларга мамлекеттик деңгээлдеги жогорку наам берүү сунушталды

© Sputnik / Табылды КадырбековӨКМ кызматкери. Архив
ӨКМ кызматкери. Архив - Sputnik Кыргызстан, 1920, 20.02.2021
Жазылуу
Мындан төрт жыл мурун "Кыргыз Республикасынын эмгек сиңирген куткаруучусу" деген ардак наам алып салынган.
БИШКЕК, 20-фев. — Sputnik. Куткаруучулар үчүн "Кыргыз Республикасынын Жарандык коргонуусунун мамлекеттик тутумунун эмгек сиңирген кызматкери" деген жогорку наам негиздөө сунушталууда. Аталган мыйзам долбоорун Жогорку Кеңештин вице-спикери Нурбек Сыдыгалиев демилгелеп, коомдук талкууга чыгарды.
Мыйзамдын маалым катында 2017-жылы "Кыргыз Республикасынын мамлекеттик сыйлыктары жана ардак наамдары жөнүндө" мыйзамынан "КР эмгек сиңирген куткаруучусу" деген ардак наам алып салынганы белгиленет. Бул адам өмүрүн сактап жүргөн куткаруучуларга туура эмес мамиле деп эсептейт авторлор.
Алар өлкө аймагында жыл сайын 4000ге жакын өрт, 3000ге чукул өзгөчө кырдаалдар жана кырсыктар катталарын мисал келтирген.
"Адам өмүрүн сактоо – жогорку кесипкөйлүктү жана эрдикти талап кылган жооптуу, өтө татаал жана кооптуу жумуш. COVID-19га каршы күрөшүү учурунда да ӨКМдин бөлүмдөрү жогорку жоопкерчилик менен ат көтөргүс жүктү аркалады. Бул – ӨКМ кызматкерлеринин негизги максаты калкты жана аймактарды өзгөчө кырдаалдардан коргоо экенинин дагы бир далили", — деп жазылган.
ӨКМ куткаруучуларына төмөнкүлөр кирет: өрт өчүрүүчү, тоодогу куткаруучу, суучул-куткаруучу, альпинист-куткаруучу, жалпы багыттагы куткаруучу, медициналык кызматкер, инженер-химик, радиолог, инженер-геолог, гидрокурулушчу, гидрометеоролог, мониторинг адиси, көчкүгө каршы кызматтар, авиация кызматкери, курулушчу, механик.
Жаңылыктар түрмөгү
0