Сооронбай Жээнбеков аткарылбай калган кыялын айтты

© Sputnik / Табылды КадырбековВнеочередное заседание Жогорку Кенеша в госрезиденции "Ала-Арча"
Внеочередное заседание Жогорку Кенеша в госрезиденции Ала-Арча - Sputnik Кыргызстан
Жазылуу
Жээнбеков президенттиктен кетип жатып ушул курак, ушул кызматка жеткенге чейинки топтогон тажрыйбасын мындан ары да эл үчүн колдон келишинче жумшай турганын айткан.

БИШКЕК, 16-окт. — Sputnik. Ар бир президенттин чоң кыялы, максаты болот экен. Менин амбициялуу максатым — Кытай — Кыргызстан — Өзбекстан темир жолун куруу долбоору эле. Бул тууралуу Сооронбай Жээнбеков бүгүн Жогорку Кеңештин жыйынында президенттин ыйгарым укуктарын өз ыктыяры менен тапшыргандыгын расмий жарыялап жаткан учурунда билдирди.

Ал баса белгилегендей, бул долбоор боюнча жогорку деңгээлдеги сүйлөшүүлөр болуп, саясий чечим кабыл алынган.

"Эксперттер ишке киришип, маселе ордунан жылган. Билесиздер, бул долбоор Кыргызстандын келечеги үчүн аба менен суудай зарыл. Бийликке келе жаткан азаматтарга ушул ишти улантуу аманатын калтырып кетип жатам. Кудайдын колдоосу менен бул долбоордун ишке ашуусун тилейм. Албетте, бүтпөй калган иштер калды. Буга ичим ачышпай койбойт. Аткарылчу дагы милдеттер көп эле. Ушул курак, ушул кызматка жеткенге чейинки топтогон тажрыйбамды мындан ары да элим үчүн колдон келишинче жумшайм", — деген Жээнбеков.

Президентти кызматтан кетирген элдик толкундоо

2020-жылдын 4-октябрдагы парламенттик шайлоонун жыйынтыгына нааразы болгон эл эртеси "Ала-Тоо" аянтына митингге чыккан. Акцияга оппозициялык маанайдагы саясий күчтөр менен биргеликте 10 миңге жакын киши чогулган. Кечинде митингчилер Ак үй тарапка агылып, милиция кызматкерлери менен кагылышкан. Мунун кесепетинен бир адам каза болуп, эки тараптан тең миңге чукул жаран жабыркады. Алты саатка созулган тирешүүдөн кийин күч түзүмдөрү артка чегинип, эл Ак үйдү басып алган.

Андан соң абакта жаткан мурдагы президент Алмазбек Атамбаев, экс-премьер-министр Сапар Исаков жана башка саясатчылар менен катар Садыр Жапаровду да бошотушкан.

Бешинчи президент кантип кетти. Жээнбековдун отставкасынан сүрөт түрмөк

9-октябрда Жээнбеков өлкөдө мыйзамдуулук орноп, укуктук талаага кайткандан кийин отставкага кете турганын жар салган.

Эртеси абактан чыгып кеткен Атамбаев жана башка бир нече аткаминерлер кайрадан кармалды. Сапар Исаков менен Албек Ибраимов абакка кайтпай, ушул тапта алардын кайда экени белгисиз.

Ал ортодо өкмөт үйүнүн алдында жүздөгөн адамдардын митинги токтоосуз өтүп жатты. Алар Жапаровго эки тизгин, бир чылбырды берүүнү талап кылып турушту.

Ал эми Садыр Жапаров жаңы өкмөттү курап келип, 14-октябрда ЖК тарабынан премьер-министрликке дайындалды. Ошол эле күнү Жапаров президент элдин талабын аткарып тез арада отставкага кетиши керектигин айтты. Бирок Жээнбеков парламенттик шайлоону өткөрүп коюп анан кызматын тапшырарын билдирип жаткан.

Элден кечирим сурады. Депутаттар тактан түшкөн Жээнбековду узаткан видео

Деген менен эртеси, 15-октябрда, мамлекет башчы отставкага кетүү чечимин кабыл алганын жар салды.

Мыйзам боюнча бул учурда ЖК төрагасы Канат Исаев президенттин милдетин аткарып калышы керек эле. Бирок ал парламенттин мөөнөтү бүтүп калганын айтып, бул кызматка отурууга моралдык укугу жок экенин билдирип баш тартты. Мындан улам мамлекет башчынын укуктары убактылуу премьер-министр Садыр Жапаровго өттү.

Жаңылыктар түрмөгү
0