Күн сууктады! Бишкекте эртеңден тарта жылуулук берилет

Жазылуу
Гидрометеорологиялык борбордун маалыматы боюнча, акыркы үч суткада абанын температурасы 8 градустан төмөн болду. Мэрия мындай аба ырайы бир нече күн кайталанганда жылуулук берип баштайт.

БИШКЕК, 8-окт. — Sputnik. Эртең, 9-октябрдан тарта, Бишкекте жылуулук берилип баштайт. Тиешелүү буйрукка кол коюлганын шаардык муниципалитеттин маалымат кызматы кабарлады.

Ага ылайык, мэрдин турак жай-коммуналдык чарба боюнча орун басары Алимбек Абдылдаев калааны күз-кыш мезгилине даярдоо боюнча шаардык штабдын отурумун өткөргөн. 

Маалыматта айтылгандай, ордо калаада беш күн катары менен абанын табы +8 градус болуп кармалып турганда жылуулук берүү башталат.

Гидрометеорологиялык борбордун маалыматы боюнча, акыркы үч суткада абанын орточо температурасы 8 градустан төмөн болду. Ал эми 9-12-октябрь күндөрү дагы абанын температурасы 8 градус болору болжолдонгон.

Токтогулдагы абал: кышында электр кубатынан кыйналбайбызбы? Эксперттик пикир

Ошондой эле борбор калаадагы эпидемиологиялык кырдаалда иштеп жаткан оорукана, клиника жана башка мекемелерди эске алуу менен эртеңден тарта жылуулук берүү чечими кабыл алынган.

"Объектилерге жылуулукту берүү адаттагыдай эле бир нече күнгө созулат. Биринчи кезекте мектеп, бала бакча, оорукана, төрөт үйлөрү жана социалдык коргоо мекемелерине берилет. Экинчиден, жылуулук энергиясы үчүн карызы жок жана объектинин кыш мезгилинде иштөөгө даярдыгы жөнүндө актысы бар турак үйлөргө, өнөр жай ишканаларына жана мекемелерге бериле баштайт", — деп айтылат маалыматта.

Белгилей кетсек, көп кабаттуу турак үйдү жылуулукка туташтырууда үстүңкү кабаттагы батирлерде жайгашкан крандар аркылуу жылуулук системасынан абаны чыгаруу керек. Бул ыкма батирлерге жылуулуктун берилишин тездетет.

Шаардыктардын үйүнө ысык суу менен жылуулукту эки уюм — Улуттук энергетикалык холдингдин туунду ишканасы "Бишкек жылуулук" ААКы менен мэрияга караштуу "Бишкек жылуулук энергия" коммуналдык ишканасы берет.

Жаңылыктар түрмөгү
0