БИШКЕК, 6-июн. — Sputnik. Кыргыз-түрк "Достук" ооруканасы кечээтен баштап коронавирус жуктурган бейтаптарды кабыл ала баштады. Бул тууралуу саламаттык сактоо министринин орун басары Нурболот Үсөнбаев билдирди.
"Оорукана 72 орунга ылайыкталган. Жалпысынан 35 медик иштеп жатат. 12 интенсивдик терапия палатасы бар", — деди Үсөнбаев.
Эске салсак, Республикалык клиникалык жугуштуу илдеттер ооруканасы убактылуу жабылган. Азыр анда бардык кызматкерлерден анализ алынып, медициналык жайды дезинфекциялап жатышат.
Мындан бир апта мурда оорукананын жанында жашагандардын ичинен 60ка чукул киши аталган жайда коронавируска кабылгандардын дарылануусуна нааразылыгын билдирип чыккан. Алар жарандардын коопсуздугуна эч кандай кепилдик жок, райондо калк жыш жайгашкандыктан вирус тез жайылып кетиши мүмкүн деген кооптонуусун билдирген эле. Бирок Саламаттыкты сактоо министрлигинин өкүлү эл менен сүйлөшүп, эрежелер катуу сакталарын түшүндүрүп, алар тарап кеткен.