Чаткалга Бишкектен медиктердин тобу жөнөп кетти

БИШКЕК, 18-май — Sputnik. Бүгүн, 18-майда, Жалал-Абад облусунун Чаткал районуна коронавирус менен күрөшүүгө жардам бериш үчүн медиктердин тобу жөнөп кетти. Бул тууралуу Саламаттык сактоо министрлигинин маалымат кызматы кабарлады.

Билдирүүгө ылайык, Чаткал районундагы жалпы дарыгерлер борборуна акушер-гинеколог, инфекционист, реаниматологдордон турган топ кеткен.

Дарыгерлердин жумушчу сапарына кеткен бардык чыгымдар жана кошумча төлөмдөр эпидемиологиялык фонддон каржыланмакчы.

16-17-май күндөрү дагы Нарын облусуна медиктердин эки бригадасы кеткенин министрликтен кошумчалашты.

Маалыматка ылайык, ушуну менен аймактарга медиктерден турган жалпы 12 топ кетти.

Эске салсак, Чаткалда коронавирусту 35 адам жуктуруп алган. Ал эми Нарын облусунда бул сан 183кө жетти.

Коронавирустун кесепети

Кыргызстанда коронавирус жуктуруп алгандардын саны 1216 болду. Анын ичинен 827си айыгып, 14 киши каза тапкан.

11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.

Ушу тапта өлкө аймагында абал кандай болуп жатканын Sputnik жүргүзгөн тексттик трансляциядан билүүгө болот.

Кабарларды ыкчам, ыңгайлуу шартта окуу үчүн Telegram каналыбызга баш багыңыз.