22:33 01 Кулжа 2020
Түз эфир
  • USD73.4927
  • EUR81.8635
  • RUB1.0542
Коом
Кыскача шилтеме алуу
Коронавируска байланыштуу Кыргызстандагы кырдаал (1471)
981 0 0

15-апрелден тарта эпидемиологиялык кырдаалга байланыштуу Нарын шаары менен Ат-Башы районуна өзгөчө абал киргизилген. Ушу тапта Нарын шаарындагы бейтаптар толугу менен айыгып чыкса, Ат-Башыда абал оор.

Ат-Башы районунун акими Нурбек Сатаровго Sputnik Кыргызстан маалымат агенттигинин кабарчысы бир катар суроолор менен кайрылды.

— Учурда Ат-Башы районунда киргизилген өзгөчө абал кандай өтүүдө?

— Бүгүн ошол өзгөчө абалдын талаптары менен иш алып барып жатабыз. Райондо азык-түлүк саткан дүкөндөр гана иштеп жатат. Элге түшүндүрүү иштери жүргүзүлдү. Азык-түлүк алуу үчүн дүкөнгө киргенде аралыкты сакташууда.

Кампадагы ун. Архив
© Фото / пресс-служба правительства/ Алишер Алиев
— Коменданттык саатты бузгандар тууралуу да маалымат айтылып жатат.

— Район боюнча суткасына экиден-үчтөн киши катталууда. Андан ашкан жок. Ар бир айылда коменданттык сааттын тартибин көзөмөлдөгөн милиция кызматкерлеринин тобу иштеп жатат. Ат-Башы райондук ички иштер бөлүмүнүн кызматкерлери менен катар Бишкек жана Балыкчы шаарларынан кошумча күч келген.

— Жергиликтүү элде нааразычылык жаралган жокпу?

— Учурдагы абалды эл түшүнүү менен кабыл алууда.

— Азыр Ат-Башыда айдап себүү иштери башталды да...

— Мындай кырдаал жазгы талаа жумуштарына сөзсүз тоскоолдук жаратууда. Бирок биз дыйкандардын 80 пайызынан ашыгына арзан үрөн жана май жеткирип бердик. Май куюучу жайларда күйүүчү май 42 сомдон сатылып жатса, биз борбордук аппарат менен сүйлөшүп, дыйкандарга 36 сомдон 38 сомго чейин эшигинин алдына түшүрүп бергенбиз.

— Жайытка, тоого мал айдоого тосколдуктар жаралган жокпу?

— Күндүз жайытка мал айдап өтсө болот. Атайын коюлган тосмолордон үй карантининде жаткандар гана өткөрүлбөйт.

— Коронавирус жуктурган бейтаптардын абалы кандай?

— Ат-Башы районунда коронавирус жуктургандардын саны жалпы 63кө чыкты. Бүгүн да алты жаңы учур катталды. Ал эми обсервациядагылар менен изолятордо жаткандарды кошкондо баш-аягы жүз бир адам болду. Үй карантинде жаткан 300дөн ашуун киши бар. Изолятордо жаткан бейтаптардан оорунун клиникалык белгилери байкалган жок.

— Вирус жуктургандар менен байланышта болгондорду тактап жатабыз деген элеңиздер...

— Коронавирус жуктурган учур райондо күнүнө катталууда. Ошол себептен алар менен байланышта болгондорду улам аныктоого туура келип жатат. Ал эми мурунку жуктурган бейтаптар боюнча маселе жок. Алардын бардыгы такталып бүткөн. Үй карантиндеги адамдар тууралуу толук маалымат бар. Бул жарандар жашаган аймактар өзгөчө көзөмөлгө алынууда.

— Борбордон да дарыгерлер келдиби?

— Ооба, Бишкектен жана Нарын шаарынан ондон ашык дарыгерлер келишкен. Алар бейтаптар менен иштеп, райондогу медиктерге жардам көрсөтүүдө. Арасында дарылоочу врач, эпидемиолог, акушерлер бар.

Тема:
Коронавируска байланыштуу Кыргызстандагы кырдаал (1471)

Тема боюнча

Пенсия, жөлөк пул алса болот. Бишкектин конуштарын көчмө кассалар тейлейт
Жалал-Абадда COVID-19 жуктургандардын 70 пайызы айыгып, жаңы учур каттала элек
Белгилер:
дыйкан, дарыгер, өзгөчө абал, коронавирус, Ат-Башы

ЭҢ МААНИЛҮҮ