Бүгүн 120 зыяратчы кетмек. Умрага барчу кыргызстандыктар эмне болот?

© REUTERS / AHMED JADALLAHЗыярачтылар. Архив
Зыярачтылар. Архив - Sputnik Кыргызстан
Жазылуу
Бүгүн Сауд Аравиянын Тышкы иштер министрлиги умрага (кичи ажылыкка) зыяратты убактылуу токтотконун кабарлап, буга ушу тапта дүйнөдө жайылып жаткан коронавирус себеп экенин билдирди.

Кичи ажылыкка кыргызстандыктар да байма-бай барып турушат. Зыярат алдында алар алдын ала визаларын бүтүрүп, билеттерин алып коюшат. Зыяраттын убактылуу токтотулганы кыргызстандыктарга кандай таасирин тийгизди? Билет алып камынып алгандар эми эмне кылат? Sputnik Кыргызстан агенттиги билип көрдү.

Ask Travel туристтик компаниясы кыргызстандыктарды ажылыкка жөнөтүү иштери менен алектенет. Компаниянын башкы директору Марат Нуралиев Сауд Аравиянын бүгүнкү билдирүүсү күтүүсүз болгонун айтты. Көрсө, аталган компания аркылуу эле бүгүн кичи ажылыкка Кыргызстандан 120 киши кетмек экен.

"Бул кабарды эртең менен угаарыбыз менен элчилик, Сауд Аравиядагы өнөктөштөр менен байланышып, маалыматты тактадык. Рейстерди токтотуп, билеттин акчасын артка кайтаруу боюнча тиешелүү чараларды көрдүк. Электрондук визанын акчасы банк аркылуу Сауд Аравиянын Тышкы иштер министрлигине төлөнөт. Каражатты кайтаруу боюнча ал жакка кат жөнөтүп, жообун күтүп жатабыз. Ал эми кичи ажылыкка камынып алгандарга чалып, эскертип, түшүндүрүү иштерин жүргүздүк", — деди Нуралиев.

"Кызмат саякат-Умра" туристтик компаниясы да кыргызстандыктарды кичи ажылыкка жөнөтөт. Бирок жакынкы арада бул компания аркылуу бир да адам кичи ажылыкка кетпей турганы маалым болду. Жетекчиси Абдулахит Нарматов коронавирустан улам Сауд Аравия зыяратты токтоткону боюнча кардарларга түшүндүрүү иштери жүргүзүлөрүн кошумчалады.

Аэропорттогу жүргүнчү. Архив - Sputnik Кыргызстан
Министрлик Италиядан келгендер эмне үчүн карантинге алынбаганын түшүндүрдү
Муфтияттын ажылык бөлүмүнүн башчысы Жолдош Абдылдаев бул маселе боюнча ажылык бөлүм Сауд Аравияга кат жибергенин айтты.

"Кичи ажылык зыяратын токтотуу боюнча билдирүү келгенден кийин Сауд Аравияга "ажылыктын жалпы инструкциясы боюнча кандай талаптар бар, толук маалымат берип койгула" деген кат жөнөттүк. Алардан жооп келери менен коомчулукка маалымдайбыз", — деди Абдылдаев.

Коронавирустун жаңы түрүнүн кооптуулугунан улам көп мамлекеттер туристтерге "эшигин жаап", эл аралык ири иш-чаралар токтотулууда. Алсак, 2020-жылдагы Токио Олимпиадасына лицензия берген күрөш боюнча Кыргызстанда өтө турган турнир болбой калды.

Жаңылыктар түрмөгү
0