Министрлик Индонезияда акысыз билим алуу үчүн сынак жарыялады. Шарт-талабы

© Sputnik / Файед Эль-Гезири / Медиабанкка өтүүДжакарта шаары, Индонезия. Архив
Джакарта шаары, Индонезия. Архив - Sputnik Кыргызстан
Жазылуу
Окутуу үстүбүздөгү жылдын 2-майынан 15-августуна чейин Индонезиянын искусство жана маданият борборлорунун биринде өтөт. Катышуучулар билдирмени 12-февралга чейин Кыргызстандын Тышкы иштер министрлигине тапшырышы керек.

БИШКЕК, 4-фев. — Sputnik. Индонезиянын Тышкы иштер министрлиги искусство жана маданият тармагы боюнча билим алам дегендер үчүн стипендиялык программасын жарыялады. Бул туурасында Билим берүү жана илим министрлигинин маалымат кызматы билдирди.

Маалыматка ылайык, окутуу үстүбүздөгү жылдын 2-майынан 15-августуна чейин Индонезиянын Бали, Батыш Суматра, Чыгыш Калимантан, Батыш Ява, Түштүк Сулавеси жана Жокьякарта провинцияларында жайгашкан искусство жана маданият борборлорунда өтөт.

"Стипендианттар бир жума жашагандан кийин алардын кызыгуусуна жараша арт-борборлорго бөлүштүрүлөт. Бардык борборлор Индонезия маданияты жана искусствосу менен тааныштырат. Ошону менен бирге айрым курстар айырмаланат. Мисалы, Батыш Явада салттуу батик кездемесин даярдоо жараянын жана Ява бийин үйрөнүшөт. Балиде болсо – Бали бийи жана гамелан улуттук оркестри боюнча билим алышат. Программанын акырында бардык катышуучулар маданият жана искусство кечесине барышат", — деп айтылат маалыматта.

Стипендиялык программа төмөнкү чыгымдарды камтыйт:

  • окутуу акысын, класстардан сырткары иш-чаралар;
  • эки тарапка авиабилет;
  • жатакана жана тамак-аш;
  • медициналык камсыздандыруу (чектелген), ар бир катышуучуга жеке медициналык камсыздандыруу алуу сунушталат;
  • жергиликтүү транспорт;
  • ай сайын 2 000 000 рупий стипендия берилет.

Талаптар:

  • 21 жаштан 27 жашка чейин;
  • үй-бүлөлүү болбошу керек;
  • орто билими бар;
  • англис тилин билүү зарыл;

Индонезия маданиятын жана искусствосун үйрөнүүгө басым койгон жана Индонезия тилин (минималдык деңгээлде) билгендерге артыкчылык берилет.

Сынакка катышууну каалагандар төмөндөгү документтерди бериши керек:

  • мотивациялык кат;
  • паспорт өлчөмүндөгү кызыл фонго түшкөн эки сүрөт:
  • жарактуу мөөнөтү эки жылдан кем болбогон жалпы жарандык паспортунун фотокөчүрмөсү;
  • академиялык дипломунун фотокөчүрмөсү;
  • акыркы алынган медициналык справканын фотокөчүрмөсү;
  • сунуштама каты;
  • программанын шарттарына макулдугун берген арыз.

Катышуучулар толтурулган билдирмени 12-февралга чейин Кыргызстандын Тышкы иштер министрлигине тапшырышы зарыл. Документтердин көчүрмөсүн 2pd@mfa.gov.kg электрондук дарегине жөнөтүү керек.

Жаңылыктар түрмөгү
0