БИШКЕК, 31-окт. — Sputnik. Жогорку Кеңештин депутаты Зиядин Жамалдинов Ветеринардык жана фитосанитардык коопсуздук боюнча мамлекеттик инспекциянын кылган иши начарлап кеткенин парламенттин жалпы жыйынында айтты.
Эл өкүлү мал-жандыкты идентификациялоо иштери башталып аягына чыкпай калганын айтып, "Мекеменин жетекчиси эмне иш менен алектенип жатат?" деп суроо салды.
Ал ошондой эле базарлардагы лабораториялардын көбү жеке менчикке өтүп кеткенин, акча берсе каалагандай справка жазып берүүгө даяр экенин билдирди.
"Базарлардагы лабораториялардын бардыгы жеке менчикке берилип кетти. Аларга акча берип койсо эле каалагандай справка жазып бере берет экен. "Ош" базары менен "Аламүдүн" базарынын эт саткан жеринин абалы начар. Кандай машинада эт келип жатат? Эч кандай көзөмөлгө албайт, текшербейт. Биз бул жакты алдын ала карабасак, оору чыгып кетсе элге зыяны тийип калат", — деди депутат.
"Ветеринардык инспекция бүгүнкү күнү эмне менен алек болуп жатат? Кыргызстандан 40 миң эшек чыгыптыр, мына ошону чыгаруу менен алек болуп жатат, себеби ал жактан акча түшөт экен. Андан сырткары, чет жактан келген канаттуулардын этин киргизүүгө уруксат берип, реестрге каттоого кызыкдар. Ал жактан да акча түшөт экен", — деди ал.
Депутат "Ушундай мыйзам бузуулар болуп жатса, укук коргоо органдары кайсы жакты карап отурат?" деп нааразы болду.