БИШКЕК, 27-окт. — Sputnik. Кыргызстанда жана дүйнөнүн бир катар мамлекеттеринде география боюнча диктант өттү. Ири масштабдуу акция Россия президенти Владимир Путиндин демилгеси менен Орус географиялык коомчулугу тарабынан ишке ашырылып келет. 2015-жылдан бери диктанттын арышы бир топ кеңейди: эгер алгач Россиянын эле аймактарында өтүп келсе, бүгүнкү күндө ал жүздөн ашуун өлкөнү камтыды.
Бир нече жыл ичинде акция Кыргызстанда да популярдуу боло баштады. География боюнча жат жазуу Ош, Ысык-Көл жана Чүй облустарында жети аянтчада өтүп, ага 720 адам катышты.
Sputnik кабарчысы борбор калаадагы аянтчалардын биринде болуп, диктанттын кандай өткөнүнө саресеп салып келди.
Суроолор видеопрезентация форматында берилди. Аларды ырчы, теле алып баруучу Сергей Шнуров, "Россия" телеканалынын алып баруучусу Мария Ситтель, режиссёр, сценарист жана продюсер Никита Михалков узатты. Диктант баш-аягы 45 мүнөткө созулду.
Өз билимин сынап көрүүгө ар кыл адистиктеги жана ар башка курактагы адамдар келген. Аянтчалардын биринин менеджери Евгения Левшунова жат жазуу жазгандардын аудиториясы жылдан жылга өзгөрүп бара жатканына токтолду.
"Эгер алгачкысында диктантка орто жаштагы адамдар кызыгып келсе, былтыр жаштар көп болду. Бир да жолкусун калтырбаган катышуучулар да бар", — деди ал.
Александр Семенов диктантка биринчи жылы эле катышып жаткан жок. Пенсионер география ага мектеп партасынан эле жакканын айтып берди.
"Быйыл суроолор оор жана кызыктуу экен. Менин билишимче, мунун үстүндө эксперттердин тобу иштеген. География байыркы илимдердин бири, анын маанилүүлүгүн жашырып болбойт. Тест бардык адамдарга туура келет. Диктантка жыл сайын өз мүмкүнчүлүгүмдү текшерүү үчүн келем", — дейт Семенов.
Диктант төрт вариантта түзүлөт. Биринчиси - Россия аймагында жана чет өлкөдөгүлөр үчүн; экинчиси - көрүүсү начар адамдар үчүн; үчүнчүсү - онлайн түрүндө; төртүнчүсү - демонстрациялык болуп саналат. Бардык варианттар орус жана англис тилинде.
Долбоор географиялык билимди популяризациялоо жана калк арасында географияга болгон кызыгууну арттыруу максатын көздөйт.
Былтыр географиялык диктантты 97 өлкө жазган. Төрт жылдын аралыгында катышуучулардын саны 900 миңге чамалап барды.
