Донор банктар Кыргызстанда китеп чыгарууга миллиондогон акча которгон

БИШКЕК, 18-сен. — Sputnik. Дүйнөлүк банк 2004-жылдан берки соңку он беш жыл ичинде Кыргызстанга окуу китептерди чыгарууга 10 миллион долларга чукул каражат берген. Бул маалыматтар Булан институтунун "Кыргыз Республикасында мектептерди окуу китептер менен камсыз кылуу маселелери" деген аталыштагы жаңы баяндамасында айтылат.

"Дүйнөлүк банктын Кыргызстандагы өкүлү Болормаа Амгаабазар Булан институтуна билдиргенге караганда, "Элет жеринде билим берүү" (2004-2011) жана "Билим берүү секторунда реформаларды (2033-2019) колдоо" деп аталган эки долбоордун алкагында окуу китептерди чыгарууга берилген акчанын жалпы суммасы 9 711 639 долларды түзөт", — деген маалыматтар айтылган.

Бул баяндамада окуу китептерин чыгарууга Азия өнүктүрүү банкы (АӨБ) да каражат бергендиги маалымдалган.

АӨБ "Кыргызстанда билим берүү системасын бекемдөө" деп аталган долбоорго жалпы 15,5 миллион доллар берип, анын ичинен 1,4 миллион доллар окуу китептерин басууга жумшалган. АӨБдин Кыргызстандагы өкүлчүлүгүнүн кызматкери Маматкалил Разаевдин Булан институтуна билдиргенине караганда, бул каражатка 573 650 китеп жана мугалимдер үчүн 54 000 колдонмо чыгарылган.

Эске салсак, Булан институтунун бул баяндамасы Кыргызстан эмне үчүн өз алдынча окуу китептерин иштеп чыгуу жана басууну жолго коё албай келе жаткандыгын анализдейт. Учурдагы окуу китептерин чыгаруу боюнча жоболорду жана ага жооптуу тараптардын ар биринин функцияларын талдап чыккан.