Кокустукпу же?.. Сатып алуулар порталында жарыялар коррупциялаша баштадыбы

© AFP / SAUL LOEB Доступ к интернету в КР
Доступ к интернету в КР - Sputnik Кыргызстан
Жазылуу
Мамлекеттик сатып алуулар порталындагы орусча сөздө латын ариби аныкталды. Башта бул ыкманы коррупционерлер колдонуп келишкен.

БИШКЕК, 6-сен. — Sputnik. Финансы министрлигинин мамлекеттик сатып алуулар департаментине караштуу порталда "коррупциялашкан" латын тамгасы колдонулган тендерлер аныкталды. Бул жарнамалар Коргоо министрлигине караштуу "Семетей" мейманканасына таандык.

Мамлекеттик мекеме орусча "гос" деген сөздүн "с" тамгасын латын ариби менен жазып, мамлекеттик сатып алуулар порталына сынактарын жарыялап келет. Латын ариби кириллица менен жазылган сөздөрдүн арасына кирип кетпеши үчүн порталдын системасы жаңыланган.

Задержание с поличным сотрудницы Центра образования Октябрьского района Бишкека  - Sputnik Кыргызстан
УКМК коррупционерлерден канча акча өндүргөнүн жарыялады
Белгилей кетсек, "Коррупциялашкан" латын тамгаларын мамлекеттик сатып алуулар порталынан (zakupki.gov.kg) аныктоо жолу жөнөкөй. Мисалы, "издөө" деген жерге латынча "с" тамгасын жазганыбызда, тиешелүү ариптер колдонулган сынактардын тизмеси чыгат.

Эгер кириллица менен жазылган жарнамада латын тамгасы аралашып кетсе сайтка чыкканда аны башка компаниялар көрбөйт, таба албайт. Натыйжада латын тамгасы жазылганын билген тарап гана сынакка катышкан жалгыз компания болуп калат.

Sputnik Кыргызстан агенттигинин кабарчылары "Семетей" мейманканасынын өкүлдөрү менен байланышты. Мекеменин коммуналдык-эксплуатациялык кызматынын жетекчиси Акматбек Жусубалиев сөз эмне жөнүндө болуп жатканын түшүнбөй турганын билдирди.

"Тендерлер менен мен алектенем. Кайсы латын тамгасы кеткенин билбейт экенмин. Бирок биз бул тендерлерди эки жылдан бери жарыялап жүрөбүз. Ушул убакыттын ичинде Мамлекеттик сатып алуулар департаментинен эч ким эскертүү берген эмес", — деди Жусубалиев.

Анын айтымында, порталга жарыяланган тендерде көрсөтүлгөн сумма аз болгондуктан, айрым сынактарга жеке компаниялар катышуудан баш тартып жатышат.

2016-жылы Финансы министрлигине караштуу Мамлекеттик сатып алуулар департаментинин директор орун басары Сүйүнтбек Мүсүралиев Sputnik Кыргызстан агенттигине сатып алуулар сайты "латындашкан" коррупциячылардын жолун бууганын айткан болчу.

Анын сөзүн Мамлекеттик сатып алуулар департаментинин директору Нурипа Байзакова бышыктады.

"Күн сайын порталда 450-500 тендер жарыяланат. Алардын ар бириндеги латын тамгаларын текшерип отурбайбыз да. Бөтөн тамгаларды аныктоочу система ишке кирген. Сөз болуп жаткан тендерди текшерип чыгабыз", — деди Байзакова.

Мамлекеттик сатып алуулар сайты. Архив - Sputnik Кыргызстан
Сатып алуулар сайты "латындашкан" коррупциячылардын жолун бууду
"Семетей" мейманканасы жарыялаган тендерлердин бардыгында "гос" деген сөздүн акыркы тамгасы латынча "с" тамгасы менен берилип жатат. Бул мүчүлүштүк Sputnik Кыргызстан маалымат агенттигинин кабарчылары 6-сентябрда эртең менен байланышка чыккандан кийин дагы оңдолгон жок. Департаменттен ката табылбай жатканын айтышты.

Белгилей кетсек, Коргоо министрлигине караштуу "Семетей" мейманканасы бүгүн, 6-сентябрда, латын тамгасы колдонулган дагы бир тендерди жарыялады. Мамлекеттик мекеме 10-сентябрга чейин 42 337,2 сомго тиричилик буюмдарын сатып алууну көздөөдө.

 

Жаңылыктар түрмөгү
0