БИШКЕК, 9-авг. — Sputnik. Бишкек шаардык милициясы өткөн түнү калаада башаламандыкка жол берген жок. Бул тууралуу Ички иштер министрлигинин маалымат кызматы кабарлады.
Билдирүүгө ылайык, 9-августка караган түнү милиция кызматкерлери борбор калаанын чок ортосунда чогулган Алмазбек Атамбаевдин тарапташтарын кубалады.
"Алар коомдук тартипти бузуп, жолдорду тосуп, мүлктөрдү талкалап, шаардагы коомдук-саясий абалды туруксуздаштырууга аракет жасады. Андыктан укук коргоо органдары чогулгандарды таркатууга атайын каражаттарды колдонду", — деп жазылат маалыматта.
Ошондой эле министрликтен учурда башаламандык уюштурууга аракет кылгандарды аныктоо жана кармоо иштери жүрүп жатканын кошумчалашты.
Мындан тышкары, азыр шаар толугу менен милиция көзөмөлүндө экени айтылды.
