Битир-садаганы мечиттен сырткары кайда берсе болот? Муфтияттан жооп

© Sputnik / Табылды КадырбековОколо сотни тысяч верующих пришли праздничный "Айт Намаз" в центре Бишкека
Около сотни тысяч верующих пришли праздничный Айт Намаз в центре Бишкека - Sputnik Кыргызстан
Жазылуу
Орозонун аяктарына саналуу күндөр калды. Шарт-талап боюнча битир-садага дал ушул орозо айында берилет. Бирок көпчүлүк ушу кезге чейин бере элек болсо, айрымдар зекет берүүнүн жол-жобосун да билбейт. Мындан улам Sputnik Кыргызстан агенттиги муфтият менен байланышып, битир-садага тууралуу маалымат топтоду.

БИШКЕК, 28-май — Sputnik. Муфтияттын маалымат катчысы Максат Атабаев битир-садаганы кандай жолдор менен берсе болорун Sputnik Кыргызстан агенттигине айтып берди.

Эске салсак, муфтият битир-садаганын быйылкы наркын бир адамга 1 килограмм 600 грамм буудайдын баасына барабар деп бекиткен. Аны базар баасы менен алганда ар бир адамга 35 сом болот.

"Битир-садаганы жарандар өз каалоосу менен мечиттерге бере алышат. Ар бир мечитте атайын жазуусу менен кутуча илинип турат. Мындан сырткары, бардык жарандар мечитке барууга мүмкүнчүлүгү жок экенин эске алып, быйыл муфтият РСК банкы менен биргеликте электрондук капчык аркылуу төлөө ыкмасын иштеп чыкты. Анда садага берем дегендер РСК банкынын банкоматтары, терминалдары жана RSK24 мобилдик тиркемеси аркылуу төлөй алышат. Чет жакта иштеп жүргөн мекендештер үчүн бул жакшы мүмкүнчүлүк болду. Айрымдары ошол жактан туруп Кыргызстанда жашаган ата-энеси үчүн да электрондук капчык аркылуу төлөп коюшууда. Мечитке бара албагандар зекетти жардамга муктаж, ооруп жаткан же аз камсыз болгон тааныш-туугандарына деле берсе сообу тиет", — деди Атабаев.

Эске салсак, былтыр Кыргызстан боюнча жалпы битир-садакадан 36 миллион 792 миң 202 сом топтолгон. Бул тууралуу Sputnik Кыргызстан маалымат агенттигине муфтий Максат ажы Токтомушев маек учурунда билдирген. Муфтий бул чогулган акча кандайча бөлүштүрүлөрүн да тактап берген.

2019-жылдын орозо календары - Sputnik Кыргызстан
2019-жылдын Орозо календары: ооз бекитүү (имсак) жана ооз ачуу (ифтар) маалы
Токтомушевдин айтымында, бул каражаттын баары түздөн-түз муфтиятка келбейт. Чогулган битир-садаганын 50 пайызы ошол мечиттерде калат.

"Мечиттегилер ошол айылдагы муктаждарга, жетим-жесирлерге таратат. 36 миллиондун 18 миллиону жергиликтүү мечиттерде калат десек болот. Ал эми 15 пайызы райондук хатибиятка келип, ошол жерден муктаждарга берилет. 15 пайызы облустук казыяттарга, 20 пайызы муфтиятка келет. Муфтият аны үч категория боюнча муктаждарга бөлүп берет. Биринчиси — коомдук уюмдар, мисалы, жетимдер, майыптар үйлөрү. Андан сырткары, жеке арыз менен кайрылгандарга ыроолонот, медреседе окугандарга стипендия катары берилет. Эмне үчүн медреседегилерге деген да суроо болушу мүмкүн. Анткени медреседе окугандар башка жогорку окуу жайда окугандардай стипендия албайт. Ошондуктан жылына медреседе окугандарга бир жолу 700-800 сомдун айланасында кичине болсо да каражат беребиз. Элдин аманатын кайта эле муктаждарга кайтарып беребиз", — деп айткан муфтий.

Баса, Кадыр түн быйыл 31-майдан 1-июнга караган түнү белгиленмекчи.

Жаңылыктар түрмөгү
0