БИШКЕК, 3-авг. — Sputnik. Россиянын Сахалин аралында суудагы кызды куткарам деп чөгүп кеткен Жандарбек Кубаныч уулунун үй-бүлөсүнө Кыргызстандын өкмөтү 50 миң сом акчалай жардам берет. Бул туурасында өкмөттүн маалымат кызматы билдирди.
Белгилей кетсек, 17 жаштагы кыргызстандык жигит 29-июль күнү Тёплое озеро деген көлгө чөгүп кеткен кызды биринчилерден болуп куткарам деп баратканда суу тартып кеткен. Натыйжада кызды башкалар куткарып, баланы таба албай калышкан. Окуянын эртеси куткаруучулар анын сөөгүн алып чыгышкан. Сууга чөккөн кыз Россиянын жараны экени белгилүү болду.
Каза болгон жигит Ош облусунун Кара-Кулжа районунда туулган. Сахалинге жайкы каникулга барып, августтун аягында кайра кайтам деп жүргөн. Сөөгү кечээ, 2-август күнү, таңга маал мекенине алып келинди. Сөөктү жөнөтүү жана үй-бүлөсүнө материалдык колдоо көрсөтүү үчүн Сахалиндин жашоочулары менен ал жакта иштеген кыргызстандыктардын берген каражатын кошкондо жалпы 225 миң рубль чогулган.
