БИШКЕК, 20-июн. — Sputnik. Кыргызстанда күбөлөр менен жабырлануучуларды видео байланыш аркылуу суракка алууну киргизүүнү пландап жатышат. Бул туурасында токтом долбоорду Жаза аткаруу боюнча мамлекеттик кызмат сунуштаганы өкмөттүн сайтына жарыяланды.
Эгерде документ кабыл алынып калса, сот жана тергөөчү убакытты үнөмдөп, суракты видеобайланыш аркылуу жүргүзөт. Мында күбө менен жабырлануучунун коопсуздугу да жакшы сакталаары айтылган.
Суракка алынган адам тартип коргоо органдарынын жакынкы бөлүгүнө келип, ал жердеги камеранын жардамынын негизинде башка райондо же имаратта иштеп жаткан тергөөчү менен байланыша алат.
Тергөөчү аралыктан туруп суракка алуунун алдында жагдай тууралуу маалымат топтойт.
Видеоконференция жабдуулар орнотулган атайын бөлмөдө өтөт да, жазылып турат.
Эгерде күбөнү коргоо муктаждыгы жаралса, видео байланыш учурунда анын үнү жана кебетеси өзгөртүлүп көрсөтүлөт. Бул үчүн атайын техникалык ыкмалар колдонулат.
Эгерде бул токтом кабыл алынса, анда өкмөт тартип коргоо органдарынын атайын техникалар менен камсыз кылышы керек.
Токтом колдоого алынса, 2019-жылдын 1-январынан тарта күчүнө кирет.
